Májiliste qandastardy óńirlerge baǵyttaý máselesi talqylandy

Depýtat Murat Ábenov memleket iske asyryp jatqan pılottyq jobalarǵa baılanysty qoǵamda túrli pikir qalyptasqanyn aıtyp, qandastarǵa qatysty ózgerister jóninde suraqtar baryn jetkizdi.

— Bul zań jobasyn qoldaımyn. Osydan on eki jyl buryn «Serpin» jobasyn bastadyq. Ońtústik óńirlerdiń jastaryn soltústikke oqýǵa jiberip, tehnıkalyq mamandyqtarǵa beıimdedik. Joba óz nátıjesin berdi. Sondyqtan mundaı júıeli tásildi zań deńgeıinde bekitý durys dep sanaımyn, — dedi depýtat.

Sonymen birge ol syrtqy kóshi-qon men qandastarǵa qatysty engizilip jatqan ózgerister qoǵamda túsinbeýshilik týǵyzyp otyrǵanyn aıtty.

— Sońǵy ýaqytta maǵan osy máselege baılanysty birneshe adam habarlasty. Pılottyq joba kelesi jyldyń basynan engiziledi eken. Buryn qandastar qaı óńirge baratynyn ózderi sheshetin. Qazir tek belgili aımaqtarǵa baǵyttaıdy degen áńgime aıtylyp júr. Osy másele naqty qalaı bolady? — dedi Murat Ábenov.

Depýtat qandastarǵa qoıylatyn tildik talap máselesine de toqtaldy.

— Qandastarǵa qatysty Qaztest engizilgen. Biraq olardyń kırıll qarpin meńgerý deńgeıi ártúrli. Bul talap zańda naqty kórsetilmegen. Sondyqtan kópshilikke túsiniksiz bolyp otyr, — dedi ol.

Sondaı-aq depýtat qandas mártebesiniń merzimine qatysty suraq qoıdy.

— Qandas mártebesi bir jyldan bes jylǵa deıin uzartyldy degen aqparat bar. Bul ózgeris zańmen bekitildi me, álde ákimshilik deńgeıde qabyldanǵan sheshim be? — dep naqtylady ol.

Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev pılottyq jobanyń maqsaty eldiń ekonomıkalyq jáne demografııalyq múddesin eskere otyryp ázirlengenin aıtty.

— Syrtqy kóshi-qonǵa qatysty sharalar pılottyq joba aıasynda iske asyrylyp jatyr. Onyń negizgi maqsaty — elimizdiń ekonomıkalyq jáne demografııalyq múddesin eskerý, — dedi vıtse-mınıstr.

Onyń aıtýynsha, memleket eshkimdi bólip-jarmaıdy.

— Qandas bolsyn, ózge shetel azamaty bolsyn, eger adam Qazaqstanda ómir súrip, bolashaǵyn osy elmen baılanystyrǵysy kelse, memleket azamattyq alý rásiminde qoldaý kórsetedi, — dedi Erbol Tuıaqbaev.

Sonymen qatar ol eńbek kóshi-qonyn retteý úshin azamattardy jumys kúshi qajet óńirlerge baǵyttaý tetigi qarastyrylyp jatqanyn aıtty.

— Eger adamnyń kelý maqsaty ýaqytsha eńbek etý bolsa, biz olardy suranys joǵary óńirlerge jiberýdi qarastyramyz. Bul eńbek naryǵyndaǵy qajettilikke baılanysty, — dedi ol.

Vıtse-mınıstrdiń sózinshe, til bilýge qatysty bastapqy talap ta engizilip jatyr.

— Bul dúkende, qyzmet kórsetý oryndarynda qarapaıym tildesý úshin qajet. Mundaı talap halyqaralyq tájirıbede de bar, — dedi Erbol Tuıaqbaev.

Resmı málimetke sáıkes, test tapsyrǵandardyń basym bóligi belgilengen talaptan ótip jatyr. Jańa júıe qandastarǵa da, ózge úmitkerlerge de birdeı qoldanylady.

Aıta keteıik, Qazaqstannyń sheteldegi qandas stýdentterge qandaı jeńildikter usynatyny týraly tolyǵyraq myna jerden oqı alasyz.