Májiliste qalalardyń syrtqy kelbetine qatysty qujat qaralady
ASTANA. KAZINFORM – Parlament Májilisiniń qaraýyna «Qazaqstan Respýblıkasynyń keıbir zańnamalyq aktilerine Astanany jáne respýblıkalyq mańyzy bar qalalardy damytý máseleleri boıynsha ózgerister men tolyqtyrýlar engizý týraly» zań jobasy kelip tústi.
«Atalǵan zań jobasy Astananyń jáne respýblıkalyq mańyzy bar qalalardyń áleýmettik-ekonomıkalyq damý máselelerin sheshýge baǵyttalǵan. Qujatta jergilikti ókildi jáne atqarýshy organdardyń quzyretterin, onyń ishinde Astananyń sanıtarlyq qorǵaý «jasyl» aımaǵyn basqarý qaǵıdalaryn ornatý, qalalardyń syrtqy kelbetine biryńǵaı dızaın-kodty bekitý, qoǵamdyq oryndarda jarnamanyń jekelegen túrlerine shekteýlerdi engizý, jer ýchaskelerin qaıta rásimdeý tártibi normalaryn naqtylaý kózdelgen», - dedi Májilistiń Ekonomıkalyq reforma jáne óńirlik damý komıtetiniń tóraǵasy Nurtaı Sabılıanov palatanyń jalpy otyrysynda.
Sonymen qatar ol Astanadaǵy kóshi-qondy retteý tetikterin jetildirý jáne turǵyn úı qurylysyna úlestik qatysý salasyndaǵy qyzmetke qoıylatyn talaptardy kúsheıtý usynylǵanyn aıtty.
«Osy oraıda Májilistiń komıteti atalǵan zań jobasyn talqylaýǵa alyp, ol boıynsha qorytyndy ázirleýge daıyn», - dedi depýtat.
