Májiliste halyqaralyq konventsııaǵa ózgeris engizý týraly zań jobasy qaraldy
ASTANA. KAZINFORM – Májiliste «Mamandandyrylǵan mekemelerdiń artyqshylyqtary men ımmýnıtetteri týraly konventsııaǵa Qazaqstan Respýblıkasynyń eskertpesi men málimdemesin alyp tastaý týraly» zań jobasy tanystyryldy. Qujatty depýtattar qaraýyna Qazaqstan Respýblıkasy Syrtqy ister mınıstriniń orynbasary Álibek Baqaev usyndy.
Onyń aıtýynsha, atalǵan Konventsııa 1947 jyly qabyldanǵan jáne Birikken Ulttar Uıymy júıesindegi mamandandyrylǵan mekemelerdiń táýelsiz ári tıimdi jumys isteýine quqyqtyq negiz qalyptastyrady. Qujatta bul uıymdarǵa qajetti artyqshylyqtar men ımmýnıtetter berý kózdelgen.
Qazaqstan Konventsııaǵa 2020 jyly eskertpe men málimdeme jasaı otyryp qosylǵan. Alaıda BUU-nyń birqatar mamandandyrylǵan mekemeleri bul sharttarǵa qarsylyq bildirgen. Sonyń saldarynan qujat búginge deıin Qazaqstan úshin kúshine enbegen.
- Negizgi sebep – engizilgen eskertpe men málimdeme Konventsııanyń mamandandyrylǵan mekemeler qyzmetkerleriniń mártebesine jáne olardyń ımmýnıtetterine qatysty negizgi erejelerine áser etedi. Halyqaralyq tájirıbege sáıkes, mundaı normalar uıymdardyń kelisiminsiz birjaqty ózgertilmeıdi, – dedi mınıstrdiń orynbasary.
Osyǵan baılanysty BUU Quqyqtyq máseleler jónindegi basqarmasy Qazaqstanǵa eskertpe men málimdemeni alyp tastaý múmkindigin qarastyrýdy usynǵan.
Zań jobasyn qabyldaý Konventsııanyń Qazaqstan úshin kúshine enýine múmkindik beredi. Nátıjesinde elimizde BUU-nyń mamandandyrylǵan mekemeleriniń qyzmetine tolyqqandy quqyqtyq negiz qalyptasady.
Sonymen qatar spıker bul qadam BUU júıesimen yntymaqtastyqty nyǵaıtyp, Memleket basshysynyń halyqaralyq bastamalaryn iske asyrýǵa oń áser etpek. Atap aıtqanda, Ornyqty damý maqsattary boıynsha Ortalyq Azııa men Aýǵanstanǵa arnalǵan Almatydaǵy óńirlik ortalyqty ınstıtýtsıonaldandyrýǵa serpin beredi dep atap ótti.
Buǵan deıin Qazaqstan BUU forýmynda turaqty qalalardy damytý boıynsha tájirıbesin usynǵan edi.
