Májiliste búgin qandaı zań jobalary talqylanady
ASTANA. KAZINFORM – Búgin Májilistiń jalpy otyrysynda depýtattar 3 zańdy birinshi oqylymda, al 2 zańdy ekinshi oqylymda talqylaıdy.
Atap aıtqanda, depýtattar birinshi oqylymda «Nysanaly kapıtal qorlary (endaýment-qorlar) týraly» zań jobasyn talqylaıdy. Baıandamashy - Ǵylym jáne joǵary bilim mınıstri Saıasat Nurbek.
Jańa zań jobasy Úkimetpen nysanaly kapıtal qorlary men endaýment-qorlardy qurý jáne olardyń qyzmet etýiniń quqyqtyq negizin qalyptastyrý úshin ázirlengen. Endaýment-qorlardy basqarý úshin ınvestıtsııalyq tabys pen metsenattyq qyzmet nysandaryn qarjylandyrýdy qamtamasyz etetin kommertsııalyq emes uıym retinde maqsatty kapıtal qor qurý usynylady. Osy zań jobasyna ilespe retinde Azamattyq kodekske, «Bilim týraly», «Qaıyrymdylyq týraly» jáne «Ǵylym men tehnologııalyq saıasat týraly» zańdarǵa ózgerister engizý qarastyrylǵan.
«Qazaqstan Respýblıkasynyń keıbir zańnamalyq aktilerine nysanaly kapıtal qorlarynyń (endaýment-qorlardyń) qyzmeti máseleleri boıynsha ózgerister men tolyqtyrýlar engizý týraly» Qazaqstan Respýblıkasy zańynyń jobasy týraly da Ǵylym mınıstri baıandaıdy.
Jalpy otyrysta depýtattarǵa ishki ister organdarynyń qyzmeti salasyndaǵy normalardyń artyq (shamadan tys) zańnamalyq reglamenttelýin bolǵyzbaý máseleleri boıynsha túzetýlerdi birinshi oqylymda qaraý usynylady. Atalǵan zań jobasy Qazaqstan Respýblıkasy Prezıdentiniń 2022 jylǵy 13 sáýirdegi «Memlekettik apparattyń qyzmetin bıýrokratııadan aryltý jónindegi sharalar týraly» Jarlyǵyn iske asyrý maqsatymen ázirlengen. Ózgerister qoldanystaǵy 16 zańǵa engiziledi. Bul zań jobasy boıynsha depýtattar aldyna Іshki ister mınıstriniń mindetin atqarýshy Sanjar Ádilov shyǵady.
Sonymen qatar kún tártibinde «Qazaqstan Respýblıkasynyń aýmaqtyq qorǵanys týraly» zań jobasy da bar. Bul qujatpen aýmaqtyq qorǵanystyń quqyqtyq negizderi, onyń maqsattary, mindetteri men qaǵıdattary, memlekettik organdardyń, uıymdar men azamattardyń ókilettikteri men jaýapkershiligi aıqyndalady. Zań jobasyn depýtattar ekinshi oqylymda qaraıdy. Baıandamashy - Halyqaralyq ister, qorǵanys jáne qaýipsizdik komıtetiniń múshesi Maksım Rojın. Ol «Qazaqstan Respýblıkasynyń keıbir zańnamalyq aktilerine aýmaqtyq qorǵanys máseleleri boıynsha ózgerister men tolyqtyrýlar engizý týraly» zańynyń ekinshi oqylymy kezinde áriptesteriniń aldynda sóz sóılep, saýaldaryna jaýap beredi.
Jalpy otyrysqa joǵaryda atalǵan mınıstrlerden bólek ózge de vedomstvolardyń vıtse-mınıstrleri, orynbasarlary keledi. Olar jalpy otyrys aıaqtalǵannan keıin BAQ ókilderiniń saýalyna jaýap beredi.
Aıta keteıik, ótken aptanyń sársenbisi kúni ótken Májilistiń jalpy otyrysynda depýtattar jańa Salyq kodeksin talqyǵa salǵan edi. Qujatty depýtattarǵa Premer-mınıstrdiń orynbasary – Ulttyq ekonomıka mınıstri Serik Jumanǵarın tanystyrǵan bolatyn. Qujat jobasyn 4 saǵat boıy talqylaǵan depýttardyń basym kópshiligi jańa redaktsııany birinshi oqylymda qoldap daýys berdi. Qalys qalǵandar sany – 9, qarsy bolǵandar – 7, 1 depýtat daýys bermedi.
QQS salynatyn aınalymnyń tómengi shegi 40 mln teńge bolýy múmkin.
Osy sheshimniń aıasynda Úkimet jeke kásipkerlikti tirkeý rásimin qatańdatpaq.
Sondaı-aq, ol sán-saltanat salyǵy kimderge salynatyn aıtty. Naqtyraq aıtsaq, quny 450 mln teńgeden asatyn jyljymaıtyn múlik ıeleri ulǵaıtylǵan salyq tóleıdi.
Al jyldyq tabysy 33,4 mln teńgeden asatyn azamattar tabysynyń 15 paıyzyn salyqqa tóleýi múmkin.
Usynylyp otyrǵan reforma boıynsha, salyq esebin tapsyratyndar sany 30 paıyzǵa qysqarmaq.