Májiliste bazalyq jáne ámbebap bank lıtsenzııasy modelin engizýdi kózdeıtin zań jobasy tanystyryldy

ASTANA. KAZINFORM — «Bankter týraly» jańa zań jobasynda 6 negizgi baǵytta jańa erejeler engizý kózdelgen. Bul týraly Qarjy naryǵyn retteý jáne damytý agenttigi tóraǵasynyń orynbasary Oljas Qızatov aıtty. 

Agenttik ókili búgin Májilistiń qoǵamdyq palata otyrysynda «Qazaqstan Respýblıkasyndaǵy bankter jáne bank qyzmeti týraly», «Qazaqstan Respýblıkasynyń keıbir zańnamalyq aktilerine qarjy naryǵyn retteý jáne damytý máseleleri boıynsha ózgerister men tolyqtyrýlar engizý týraly» zań jobalary tanystyrdy.

— Zań jobalary Memleket basshysynyń 2024 jáne 2025 jyldardaǵy Joldaýlaryn iske asyrý maqsatynda ázirlendi. Prezıdent tapsyrmasyna sáıkes, bankter týraly zańda tehnologııalyq ózgerister, ekonomıkany qarjylandyrýdaǵy bank sektorynyń rólin arttyrý, básekelestikti kúsheıtý jáne naryqqa jańa qatysýshylardy tartý, sondaı-aq qarjylyq tehnologııalardy damytý ári tsıfrlyq aktıvter aınalymyn yryqtandyrý máseleleri kózdeledi. Qoldanystaǵy «Bankter týraly» zań 1995 jyly basqa ekonomıkalyq jaǵdaıda qabyldandy. 30 jyldyń ishinde oǵan 140-tan astam ret ózgeris engizildi. Nátıjesinde onyń quraly men termınologııasy eskirdi jáne ol bank sektorynyń qazirgi damý úrdisterin, atap aıtqanda, qarjylyq tehnologııalyq baǵytyn, qarjylyq ekojúıeniń qarqyndy damýyn kórsetpeıdi. «Bankter týraly» zań jobasynda bank qyzmetin retteýdiń negizgi maqsaty Qazaqstannyń bank júıesiniń qarjylyq turaqtylyǵyn qamtamasyz etý, — dedi Oljas Qızatov.

Onyń aıtýynsha, jańa zańda bank qyzmetin retteýdiń mynadaı 5 mindeti kózdelgen:

— bank júıesiniń jumys isteýi úshin quqyqtyq negiz belgileý;

— bank qyzmetine qatysty retteý, baqylaý jáne qadaǵalaý;

— depozıtorlardyń, ózge de kredıtorlar men klıentterdiń quqyqtary men zańdy múddelerin qorǵaý;

— bank qyzmetteri naryǵynda adal básekelestikti qamtamasyz etýge yqpal etý;

— qarjylyq saýattylyq deńgeıin jáne halyq úshin bank qyzmetteriniń qoljetimdiligin arttyrýǵa yqpal etý.

— Bank týraly jańa zań 9 bólim, 23 taraý, 135 baptan turady. Onyń qurylymy banktiń lıtsenzııa alýdan bastap, retteý men taratýǵa deıingi qyzmet etý tsıkline sáıkes qurylǵan. Bul qoldanýdyń qısyndylyǵyn, júıeliligin jáne yńǵaıly bolýyn qamtamasyz etedi. Іlespe zań jobasynda 7 kodekske jáne 35 zańǵa túzetýler engizildi, — dedi agenttik tóraǵasynyń orynbasary.

Oljas Qızatovtyń dereginshe zań jobasy aıasynda mynadaı 6 negizgi baǵytqa jańa erejeler kózdelip otyr:

— bazalyq jáne ámbebap bank lıtsenzııasy modelin engizý;

— ıslamdyq qarjylandyrýdy damytý jáne ony usyný formattaryn keńeıtý;

— is-qımyldy qadalaǵaýdy engizý jáne qarjylyq qyzmetterdi tutynýshylardyń quqyqtaryn qorǵaýdy kúsheıtý;

— problemalyq bankterdiń qyzmetin retteýdiń jańa tetigin engizý;

— bankterdi retteýdi jetildirý;

— ınnovatsııalardy qoldaý jáne qarjylyq tehnologııalar baǵyttaryn damytý. 

Aıta ketelik 2026 jyly bankter Qarjy mınıstrliginiń qundy qaǵazdarynan túsken kiristen salyq tóleı bastaıdy.