Májiliste bala kútimine baılanysty tólenetin járdemaqy merzimin 3 jylǵa uzartý usynyldy
Májilis depýtaty Qaırat Balabıev bala kútimine baılanysty tólenetin járdemaqy merzimin 3 jylǵa uzartýdy usyndy, dep habarlaıdy Kazinform agenttigi.
«AMANAT» partııasy tolyq emes otbasylardyń, asyraýshysynan aıyrylǵan otbasylardyń jáne jalǵyzbasty analardyń, jalǵyzbasty ákelerdiń áleýmettik jaǵdaıyn qoldaý, ol otbasylaryndaǵy balalardyń qalyptasyp, damýy týraly júıeli sharalardy júzege asyrýǵa baılanysty kelesi usynystardy engizedi.
«1. Qazaqstandaǵy barlyq áıel men jalǵyzbasty ákelerge bala kútimine baılanysty tólenetin járdemaqy merzimin 3 jylǵa deıin uzartýdy usynamyz. 2. Jumyssyz jalǵyzbasty analar jáne jalǵyzbasty ákelerdiń bala kútimine baılanysty aı saıynǵy áleýmettik tólem mólsherin zańda bekitilgen kúnkóris mınımýmyna teńestirýdi suraımyz», - dedi depýtat.
Sondaı-aq, ol atalǵan sanattaǵy azamattardyń balabaqsha kezegine turýy da qıyn ekenin atap ótti.
«Jalǵyzbasty analar jáne jalǵyzbasty ákelerdiń balalaryna memlekettik balabaqshadan oryn alý úshin kezekte basymdyq berýdi, mektepterde sport sektsııalaryna jáne shyǵarmashylyq úıirmelerge tegin qatysýyn qamtamasyz etýdi, eńbek naryǵyndaǵy suranysqa ıe mamandyqtarǵa kásibı baǵdar jumysynyń baǵdarlamasyn qabyldap, grant negizinde bilim alyp, eńbekke aralasýyn qarastyratyn baǵdarlama qabyldaýdy suraımyz», - dedi Qaırat Balabıev.
