Alıment qoryn qurý qaıta usynyldy
ASTANA. KAZINFORM – Qazaqstanda alıment ala almaı júrgen balalardyń aqshasyn endi memleket tóleýi múmkin. Elimizde arnaıy alıment qoryn qurý bastamasyn Qazaqstan Halyq partııasy uıymdastyrǵan dóńgelek ústelde «Astana zańgerler lıgasynyń» tóraǵasy Aınur Abatova usyndy.
Aınur Abatova sońǵy jyldary elimizde alıment boıynsha qaryz kólemi 10 esege jýyq óskenin aıtty. Osyǵan baılanysty jıyn sarapshylary máseleni júıeli sheshýdiń jańa tetigin usynyp otyr.
Eger ata-ana alımentti 3 aıdan astam ýaqyt tólemese, memleket balaǵa aqshany ýaqytsha osy qordan tólep otyrady. Balaǵa kepildik berilgen eń tómengi tólem kúnkóris deńgeıinen az bolmaýy tıis, al ketken shyǵyndy memleket keıin boryshker ata-anadan ózi óndirip alady. Qordyń ózi aıyppuldar men ózge de salyqtyq emes túsimder esebinen quralmaq.
QR Májilis depýtaty Snejana Imasheva bul qordyń kimderge qoldaý kórsetetinin naqtylap ótti.
– Alıment ala almaı júrgen otbasy eger de tabyssyz qalsa, olarǵa qarajat alýǵa múmkindik bolady. Biraq ol úshin mindetti túrde boryshkerdiń eshqandaı múmkindigi bolmaýy kerek. Bul qashyp júrgen azamattar týraly emes, shynymen de múmkindigi joq, jumysy joq, alatyn múlki joq, jumys isteıtin jaǵdaıy joq bolǵan kezde alımenttik qorǵa júginýge bolady. Osy másele qazir qaralýda, biraq áli túpkilikti sheshimin tapqan joq, – dedi Snejana Imasheva.
Aıta keteıik, Qazaqstanda 12 myń boryshker óz balalaryna 18 mıllıard teńge alıment qaryz.
