Májilismender sý tasqynynan zardap shekken óńirlerde júr
ASTANA. KAZINFORM — Juma, 29 naýryzdan bastap Májilis depýtattary sý tasqynynan zardap shekken aımaqtarǵa bardy. Búginde májilismender Aqmola, Aqtóbe, Ulytaý, Qostanaı jáne Batys Qazaqstan oblystarynda júr. Depýtattar halyqpen kezdesip, qajetti kómek kórsetýdi qadaǵalaýda. Eriktilerdiń jumysyn úılestirip, qajet bolǵan jaǵdaıda gýmanıtarlyq kómektiń jetkizilýin qamtamasyz etip jatyr.
Májilis depýtattary Aına Músirálimova men ıÝlııa Kýchınskaıa Aqmola oblysyndaǵy Qoıandy kenti men Kókshetaý qalasynda bolyp, sý tasqyny jaǵdaıymen tanysty, jedel shtabtardy aralap, óńir turǵyndarymen kezdesti.
— Árıne, qazir basty mindet — adamdardyń qaýipsizdigin qamtamasyz etý. Azamattardyń materıaldyq shyǵynyn múmkindiginshe azaıtý. Ol úshin Tótenshe jaǵdaı, Qorǵanys, Іshki ister mınıstrlikteri men ákimdikterdiń kúshteri jumyldyrylyp, eldi mekenderdiń turǵyndarynan quralǵan eriktiler jumys istep jatyr. Jedel shtabtar, aqparat almasý úshin jáne qajettilikter týraly ótinishter jiberý úshin arnaıy chattar quryldy, — dedi ıÝlııa Kýchınskaıa.
Juma kúni Májilis depýtattary Maqsat Tolyqbaı, Qazybek Álishev pen Asqar Sadyqov Aqtóbe oblysyna bardy.
Olar Qobda aýdanynyń turǵyndarymen kezdesti. Maqsat Tolyqbaı aýyldy sý basý jyl saıyn qaıtalanatynyn atap ótti.
— Ótken jyly da aýyldy sý basqan. Ol kezde biz osynda kelgen edik, memlekettiń kómegimen zardap shekkenderge arnalǵan birneshe úıdi qalpyna keltirdik. Biraq tıisti qorytyndy jasalǵan joq. Bıyl sol úılerdiń shatyry ǵana kórinedi. Barlyǵy sý astynda qaldy, — dedi Maqsat Tolyqbaı.
Sonymen qatar depýtattar Aqtóbe qalasyndaǵy jaǵdaıymen de tanysty.
Senbi kúni Májilis depýtattary Amanjol Áltaı men Erbolat Satybaldın Ulytaý oblysynyń Jezdi aýylyna bardy.
Májilismender sý tasqynynan zardap shekken turǵyndarmen kezdesip, jergilikti jerdegi ahýalmen tanysty, sondaı-aq zardap shekken úılerdi aralady.
Úılerdiń kóbi qalpyna keltirýge kelmeıdi.
— Sý astyna ketken úıler men aýlalardy araladyq. Zalaldyń ornyn toltyrý jáne saldaryn joıý úshin qajetti qarajat bólinedi. Jaramsyz bolyp qalǵandardyń ornyna jańa úıler salý máselesin qarastyramyz, — dedi Amanjol Áltaı.
Senbi kúni Májilis depýtattary Nartaı Sársenǵalıev pen Sergeı Ponomarev Batys Qazaqstan oblysynda bolyp, sý tasqynynan zardap shekken Terekti aýdany Ańqaty aýylynyń turǵyndarymen kezdesti.
— Biz aýdandyq ákimdikpen birlesip jumys isteımiz. Komıssııa músheleri úılerdiń bárin sý basqannan keıin emes, qazirgi jaǵdaıyn baǵalaıdy. Ahýal tolyǵymen turaqtanǵansha biz aýyl turǵyndarynyń qasynda bolyp, jaǵdaıdy baqylaýda ustaımyz, — dedi Nartaı Sársenǵalıev.
Májilis depýtaty Erkin Ábil Arqalyq qalasynyń turǵyndarymen kezdesti. Májilismen sý tasqynynyń saldaryn joıý jumystary áli de jalǵasyp jatqanyn atap ótti.
— Jaǵdaı memleket baqylaýynda, qazir ahýal turaqtandy, biraq úıler sý astynda qaldy. Saldaryn joıý boıynsha jumys jalǵasýda. Barlyq zalal óteledi, — dedi depýtat.
Sondaı-aq Erkin Ábil Qostanaı oblysynyń Amangeldi jáne Jangeldın aýdandarynda bolyp, jergilikti turǵyndarmen kezdesip, zardap shekken úılerdi aralady.
Odan ári depýtattar oblys ortalyqtaryna barýdy josparlap otyr.
