Májilis depýtattaryn azamattyq qaýipsizdik máselesi alańdatyp otyr
Májilistiń Ekologııa máseleleri jáne tabıǵat paıdalaný komıtetiniń «Azamattyq qorǵaý týraly» taqyrypta keńeıtilgen otyrysynda, tehnogendik sıpattaǵy apattar, ónerkásip qaýipsizdigi, elde bolyp jatqan tótenshe jaǵdaılarǵa qatysty ózekti máseleler sóz boldy, dep habarlaıdy QazAqparat QR Parlamenti Májilisiniń baspasóz qyzmetine silteme jasap.
Bapasóz qyzmetiniń habarlaýynsha, otyrysqa jetekshilik etken depýtat Edil Jańbyrshın Memleket basshysy óziniń Qazaqstan halqyna Joldaýynda tabıǵı jáne tehnogendik apattar dáýirine aıaq basqanymyz týraly birneshe ret atap ótkenine nazar aýdardy.
Biz qazir azamattardy tabıǵı qubylystardan jáne tehnogendik apattardan qorǵaý máselelerine erekshe nazar aýdarýymyz kerek. Olar ókinishke oraı, bizdiń elde ǵana emes, búkil álemde jıi bolyp jatyr. Búgin biz tótenshe jaǵdaılardyń saldaryn joıý jáne aldyn alý, órt qaýipsizdigi men ónerkásiptik qaýipsizdikti qamtamasyz etý, azamattyq qorǵaý organdary qyzmetkerleriniń áleýmettik jaǵdaıy jáne basqa da birqatar mańyzdy máselelerdiń sheshý joldaryn talqylaıtyn bolamyz, – dedi E.Jańbyrshın.
Jıynda Tótenshe jaǵdaılar mınıstri Syrym Sháriphanov Azamattyq qorǵaý salasyndaǵy 2023 - 2027 jyldarǵa arnalǵan birinshi kezektegi sharalardyń keshendi jospary bekitilgenin, onyń sheńberinde tabıǵat qorǵaý jáne orman mekemelerin, Tótenshe jaǵdaılar mınıstrliginiń materıaldyq-tehnıkalyq jaraqtandyrý deńgeıin nyǵaıtý josparlanyp otyrǵanyn aıtty.
Sonymen qatar Syrym Sháriphanov ónerkásiptik qaýipsizdik máseleleri ótkir máselelerdiń biri ekenin, jaqynda 5 kenshiniń ómirin qıǵan «Qazaqstan» ArselorMıttal shahtasynda jumys berýshiniń kinásinen bolǵan qaıǵyly oqıǵa jáne «Saran» shahtasyndaǵy órt osy salada túbegeıli sharalar qabyldaý qajettigin rastaǵanyn aıtyp, Úkimetten tıisti qoldaý tapqanyn jetkizdi. Osyǵan baılanysty mınıstr normatıvtik-quqyqtyq bazany jetildirý qajettigine nazar aýdardy.
Ákimshilik reforma sheńberinde «QR keıbir zańnamalyq aktilerine azamattyq qorǵaý máseleleri boıynsha ózgerister men tolyqtyrýlar engizý týraly» Zań jobasy ázirlendi. Onda azamattyq qorǵaý organdarynyń qyzmetkerlerin áleýmettik qamtamasyz etý; órt qaýipsizdigin qamtamasyz etý máselelerin jetildirý; memlekettik materıaldyq rezerv; ónerkásiptik qaýipsizdikti qamtamasyz etý; tótenshe jaǵdaılardyń saldaryn joıý jónindegi máselelerdi jetildirý; oqıǵalar týraly aqparatty qabyldaý jáne óńdeý jáne basqarý organdarynyń shuǵyl qyzmetterdiń ózara is-qımyly boıynsha biryńǵaı tásildi qamtamasyz etý; azamattyq qorǵanys jónindegi normalardy jetildirý; tótenshe jaǵdaılardyń aldyn alý jónindegi máselelerdi jetildirý qarastyrylǵan, – dedi mınıstr.
Jıyn barysynda Tótenshe jaǵdaılar jónindegi vıtse-mınıstri Baýyrjan Syzdyqov, Erlan Nurpeıisov sóz sóılep, saladaǵy ózekti problemalardy aıtyp, depýtattarmen talqylady.
Otyrysty qorytyndylaǵan Edil Jańbyrshın dúleı zilzalalar, avarııalar men apattar bolatynyn, alaıda aldyn-alý sharalaryn qabyldaý arqyly olardyń keri áserin aıtarlyqtaı azaıtý múmkin ekenin atap ótip, barlyq ózekti máselelerdi birlesip talqylaýǵa daıyn ekenine toqtaldy.
