Májilismender Atyraý oblysynda sý tasqyny qaýpi bar eldi mekenderdi aralady
ASTANA. KAZINFORM - Májilis depýtattarynyń elimizdiń sý basqan óńirlerine sapary jalǵasýda. Keshe Edil Jańbyrshın, Abzal Quspan, Rınat Zaıtov, Maqsat Tolyqbaı jáne Nartaı Sársenǵalıev Atyraý qalasynda, Mahambet aýdany men Qulsary qalasynda boldy, dep habarlaıdy Májilistiń baspasóz qyzmeti.
Sapar barysynda májilismender Atyraý oblysynda sý tasqynyn aldyn alýǵa atsalysyp, sý basqan eldi mekenderdiń turǵyndarmen kezdesip, zardap shekken aýdandar men aýyldardy aralady.
Jaıyq ózeninen saqtanyp, bóget salyp jatqan Almaly aýylynyń turǵyndarymen kezdesýde Nartaı Sársenǵalıev basty maqsat eldi mekenderdi tasqyn sýdan aman alyp qalý ekenine erekshe nazar aýdardy.
– Jaıyq ózeni kúnine 20 santımetrge kóterilip jatyr. Qazir munda Almalyny aralǵa aınaldyryp bógetpen qorshaýda. Sýdyń qatty soqqany sonsha, tutas tas qabyrǵalardy opyryp tastaýda. Mahambet aýdanyna da at basyn tiredik. Jaıyq aldymen osynda soǵady. Mahambet aýdanynda jalpy 21 eldi meken bar eken. Sonyń ishindegi 17 aýyl Jaıyqtyń týra janynda tur, – dedi Nartaı Sársenǵalıev.
Májilis depýtaty Maqsat Tolyqbaı Atyraýdyń biraz bóligin saqtap qalýǵa múmkindik bar ekenin aıtyp, Reseıden úlken nópirmen sý kele jatqanyna alańdaýshylyq bildirdi.
– Batys Qazaqstan oblysyna da qıyn bolaıyn dep tur. Eshkimge ońaı emes. Qazir Atyraýdy aınaldyra qorshaıtyn 21 shaqyrym damba salynyp jatyr. Ýaqyt az. Oǵan qosa Jaıyq ózeni Atyraýdyń ishimen aǵyp ótedi. Kásipkerler de qol ushyn sozyp, tehnıkasyna deıin berip jatyr. Áskerıler jumyldyryldy. Óz qaltasynan aqsha shyǵarǵan áriptes depýtattarǵa, kún-tún demeı kómek qolyn sozyp jatqan Atyraý, Almaly, Isataı, Mahambet jáne taǵy basqa aýyl turǵyndaryna alǵysymyz sheksiz. «AMANAT» partııasynyń da uıymdastyrýymen azyq-túlik, qap, qosymsha jumys kúshi, tehnıka kelip jatyr, – dedi Maqsat Tolyqbaı.
Qulsary qalasynyń turǵyndarymen kezdesýde Edil Jańbyrshın jalǵan aqparatqa ermeı, bul qıyn jaǵdaıdan birigip shyǵý kerektigine basa mán berdi.
Sonymen qatar depýtattar sý basqan birneshe shaǵyn aýdandardy aralap, jurttyń talap-tilegin Atyraý oblysynyń ákimine jetkizdi.
– Arnaıy komıssııa jergilikti belsendilerdi kirgizip, sapaly jumys atqarýy kerek. Komıssııa turǵyn úılerdi sý ketkennen keıin emes, qazirgi jaǵdaıyn eskerip baǵalaýǵa tıis, – dedi Edil Jańbyrshın.
Aıta ketý kerek, tabıǵı apat saldarynan Qulsaryda 2400 úı sý astynda qalǵan, onyń 200-den astamy qulaǵan. Búgingi kúni qalada sýdyń deńgeıi 60 sm-ge deıin tómendegen. Qazir qalada sý basqan úılerdi qurǵatý jumystary júrip jatyr. Oǵan arnaıy 58 birlik tehnıka jáne 50 adam jumyldyrylǵan. Búgingi kúnge deıin 7 800 tekshe metr sý shyǵarylǵan.
Búgin depýtattardyń sapary Batys Qazaqstan oblysynda jalǵasyp jatyr.
