Májilismen «Barbastaý–Aqjaıyq–Inder» jolyn qalpyna keltirý jumysymen tanysty
ASTANA. KAZINFORM - Májilistiń Zańnama jáne sot-quqyqtyq reforma komıtetiniń tóraıymy, «AMANAT» partııasy fraktsııasynyń múshesi Snejanna Imasheva Batys Qazaqstan oblysyndaǵy «Barbastaý – Aqjaıyq – Inder» tasjolyn qalpyna keltirý jumystarynyń barysymen tanysty.
Batys Qazaqstan oblysynda búginde respýblıkalyq mańyzy bar joldardyń qalypty jaǵdaıdaǵy úlesi 73 paıyz, al jergilikti mańyzy bar joldardyń úlesi 52 paıyz. Máseleni sheshý úshin aǵymdaǵy jyly jalpy somasy shamamen 85 mıllıard teńgege 576 shaqyrymnan astam barlyq kólemdegi joldy jóndeý josparlanǵan.
Atap aıtqanda, «Barbastaý – Aqjaıyq – Inder» tas jolyn qaıta jańǵyrtýǵa 8,3 mlrd teńge qarastyrylǵan. Merdigerler jyl sońyna deıin joldy paıdalanýǵa berýi qajet. Osy oraıda depýtat Snejanna Imasheva júrgizilip jatqan jumystardyń sapasyn tekserdi.
«Jergilikti turǵyndar ákimdik pen partııanyń oblystyq fılıalyna jol sapasyna qatysty negizdi shaǵymdarymen birneshe ret júgingen. Jóndeý jumystary júrgizilip jatqan joldyń beti birkelki emes, shuńqyrlary bar. Sondaı-aq jol jamylǵysynyń zaqymdanýyna sý tasqyny da áser etti. Saılaý naýqany kezinde partııa joldardy salý men jańǵyrtýǵa ýáde berdi. Óńirlerge issaparlary barysynda depýtattar saılaýaldy baǵdarlamanyń oryndalýyn qadaǵalaıdy. Biz merdigerlerdiń jobany ýaqytynda tapsyrýyn baqylaýǵa alatyn bolamyz. Jalpy saılaýaldy baǵdarlamamyz aıasynda oblysta 2027 jylǵa qaraı 700 shaqyrym jol jóndeledi, – dedi S.Imasheva.
«Barbastaý – Aqjaıyq – Inder» baǵyty Oral qalasyn segiz eldi mekenmen ǵana emes, Atyraý oblysymen de tikeleı baılanystyrady dep josparlanyp otyr. Jobaǵa túzetýler engizilgennen keıin jumys qaıta bastaldy jáne jyl sońyna deıin aıaqtalýǵa tıis. Jańa joldy asyǵa kútken jergilikti turǵyndar qurylysshylarǵa syn-pikirlerin de bildirdi.
– Jolda eki kólik qarsy kele jatqanda, shań kóterilip, baǵanalar kórinbeı qalady. Saldarynan arttaǵy kólikter apatqa ushyraýy múmkin. Sondyqtan sý seýip otyrý kerek. Al eger jaýyn jaýsa, munda kólikter turyp qalady. Tym bolmasa qazir osy jerge qıyrshyq tas tógip bersin, – deıdi Shaǵataı aýylynyń turǵyny Baýyrjan Aıbekov.
Nysannyń bas merdigeri – «Uniserv» kompanııasy. Onyń dırektory Dinmuhammed Sátbaev qıyndyqtarǵa qaramastan jol bıyl jyl sońyna deıin aıaqtalady dep sendirdi.
Buǵan deıin oblysta 2019-2023 jyldar aralyǵynda myń shaqyrymnan astam jol jóndeldi. Nátıjesinde normatıvtik deńgeı 28-den 52 paıyzǵa deıin kóterildi. Sondaı-aq 900 shaqyrymǵa jýyq aýdandyq mańyzy bar jáne aýylishilik joldar jóndeldi.
