Májiliske UQShU-ǵa qatysty quqyqtyq bazany jetildirý týraly qujattar engizildi
ASTANA. KAZINFORM — Parlament Májilisi Ujymdyq qaýipsizdik týraly shart uıymyna qatysty eki qujatty talqylaıdy. Bul qujattar palatanyń qaraýyna engizildi.
Birinshi qujat — «2010 jylǵy 10 jeltoqsandaǵy Ujymdyq qaýipsizdik týraly shart uıymy ujymdyq qaýipsizdik júıesiniń kúshteri men quraldary quralymdarynyń mártebesi týraly kelisimge ózgerister engizý týraly hattamany ratıfıkatsııalaý týraly» zań jobasy.
— Kelisim taraptardyń aýmaqtarynda ujymdyq qaýipsizdik júıesiniń kúshteri men quraldary quralymdarynyń ýaqytsha bolýy úshin quqyqtyq bazany retteıdi, sondaı-aq olardyń mártebesin aıqyndaıdy. Túzetýler taraptardyń aýmaǵyna quralymdardy jiberý negizderin keńeıtýdi kózdeıdi. Máselen, daǵdarys jaǵdaılaryn aldyn alýǵa, gýmanıtarlyq kómek kórsetýge, kenetten tekserýler júrgizýge, — dedi Májilistiń Halyqaralyq ister, qorǵanys jáne qaýipsizdik komıtetiniń tóraıymy Aıgúl Quspan.
Sonymen qatar Májiliske engizilgen ekinshi qujat — «2015 jylǵy 15 qyrkúıektegi Áskerı jáne basqa da quralymdardy, olardyń jyljymaly múlkin, sondaı-aq áskerı maqsattaǵy ónimdi tasymaldaý salasyndaǵy Ujymdyq qaýipsizdik týraly shart uıymyna múshe memleketterdiń yntymaqtastyǵy týraly kelisimge ózgerister engizý týraly hattamany ratıfıkatsııalaý týraly» zań jobasy.
— Kelisim áskerı jáne basqa da quralymdardy, sondaı-aq áskerı maqsattaǵy ónimderdi tasymaldaý máselesin retteıdi. Kelisimge engiziletin ózgerister atalǵan tasymaldardy uıymdastyrýǵa jáne qamtamasyz etýge baılanysty quqyqtyq bazany jetildirýdi kózdeıdi, — dedi A. Quspan.
Buǵan deıin Bishkekte ótken UQShU sammıtinde qandaı qujattar qabyldanǵanyn jazǵan edik.