Májiliske Túrkııa Uly Ulttyq Májilisiniń tóraǵasy keldi
ASTANA. KAZINFORM - Májilis spıkeri Erlan Qoshanov Qazaqstanǵa resmı saparmen kelgen Túrik Respýblıkasy Uly Ulttyq Májilisiniń tóraǵasy Nýman Kýrtýlmýshpen kezdesti.
Erlan Qoshanov Qazaqstan men Túrkııany ǵasyrlar boıy ortaq rýhanı jáne mádenı qundylyqtar biriktirip kele jatqanyn atap ótti.
– Eki el basshylarynyń berik dostyǵy, úndesken saıasaty qazaq-túrik qarym-qatynasyn jańa beleske kóterýge erekshe qarqyn berýde. Bizdiń prezıdentterimizdiń turaqty kezdesýleri – osynyń aıqyn dáleli. Biz Parlament tarapynan joǵary deńgeıde qol jetkizilgen barlyq ýaǵdalastyqtardy iske asyrý úshin qoldan kelgenniń bárin jasaımyz, – dedi Májilis tóraǵasy.
Erlan Qoshanov túrik áriptesterine Qasym-Jomart Toqaevtyń basshylyǵymen elimizde júrgizilip jatqan ekonomıkalyq, saıası reformalar týraly aıtyp berdi.
Ol búginde Qazaqstanda memlekettik bıliktiń barlyq tarmaǵyn tepe-teńdikte ustaıtyn jańa saıası júıe qalyptasyp kele jatqanyn atap ótti.
Palata tóraǵasy Memleket basshysynyń 2029 jylǵa qaraı ekonomıkanyń eki ese ósýin kózdeıtin jańa ekonomıkalyq saıasaty týraly da aıtty.
Mártebeli meımandarǵa Májilistiń zań shyǵarý qyzmeti týraly aqparat berildi. Taraptar eki el depýtattary dostyq toptarynyń jumysy týraly da pikir almasty.
Óz kezeginde Nýman KýrtýlmýshTúrkııa Prezıdent Qasym-Jomart Toqaevtyń saıası jáne ekonomıkalyq reformalaryn tolyq qoldaıtynyna nazar aýdardy.
– Bul – demokratııa jolyndaǵy batyl qadamdar. Sonyń arqasynda Qazaqstannyń halyqaralyq arenadaǵy bedeli men róli nyǵaıa túsedi. Halyqtarymyzdyń arasynda tyǵyz ári kóp qyrly baılanys ornyqty. Túrkııa men Qazaqstan kóshbasshylaryn dostyq jáne shynaıy qarym-qatynas baılanystyrady. Memleketterimiz arasyndaǵy keńeıtilgen strategııalyq áriptestik aldaǵy ýaqytta da kóptegen salada áleýetti jobalardy iske asyrýǵa septigin tıgizetinine senimdimin. Biz Parlamenttiń de, kópjaqty parlamenttik uıymdardyń da ózara is-áreketin arttyrýǵa daıynbyz, – dedi Túrik Respýblıkasy Uly Ulttyq Májilisiniń tóraǵasy.
Kezdesý barysynda Májilis spıkeri túrik halqyna sý tasqyny kezinde Qazaqstanǵa qoldaý kórsetkeni úshin alǵys aıtty.
Sondaı-aq Túrkııa Respýblıkasynyń 100 jyldyǵyna oraı ótken jyly Astanada Anadoly kóshesi, Shymkentte Túrkııa dańǵyly men saıabaq ashylǵanyn, Almatyda Mustafa Atatúrikke eskertkish ornatylǵanyn eske saldy.
Jıyn sońynda Erlan Qoshanov Uly Ulttyq Jınalys tóraǵasynyń resmı sapary saıası dıalogty nyǵaıtyp, Qazaqstan men Túrkııa arasyndaǵy parlamentaralyq yntymaqtastyqty odan ári damytýǵa qýatty serpin beretinine senim bildirdi.
