Májiliske Mońǵolııa Prezıdenti keldi
ASTANA. KAZINFORM — Qazaqstanda memlekettik saparmen júrgen Mońǵolııa Prezıdenti Ýhnaagıın Hýrelsýh Parlament Májilisine keldi. Palata tóraǵasy Erlan Qoshanovpen kezdesýde parlamentaralyq yntymaqtastyq máseleleri men elder arasyndaǵy ózara baılanysty nyǵaıtý joldary talqylandy. Bul týraly Májilistiń baspasózó qyzmeti málim etti.
Mártebeli meımandy qarsy alǵan Májilis spıkeri Mońǵolııa basshysyn qazaq-mońǵol qarym-qatynasyn damytýǵa qosqan úlesi úshin Prezıdent Qasym-Jomart Toqaevtyń qolynan eń joǵary memlekettik nagrada «Altyn Qyran» ordenin alýymen quttyqtady.
Erlan Qoshanov Mońǵolııa Qazaqstannyń Azııadaǵy senimdi seriktesi ekenin atap ótti. Sonymen qatar kóshpeli órkenıetter dáýirinen bastaý alatyn qazaq jáne mońǵol halyqtary arasyndaǵy tereń tarıhı baılanystar sońǵy jyldary odan ári nyǵaıyp keledi.
— Ekijaqty ózara qarym-qatynasty damytýdaǵy negizgi kezeń 2024 jyly Prezıdent Qasym-Jomart Toqaevtyń Mońǵolııaǵa jasaǵan memlekettik sapary boldy, onyń qorytyndysy boıynsha eki el arasyndaǵy baılanystar strategııalyq seriktestik deńgeıine kóterildi. Osylaısha qazaq-mońǵol qatynasynyń jańa kezeńi bastaldy deýge bolady. Oǵan qosa Sizdiń Qazaqstanǵa búgingi qarymta memlekettik saparyńyz áriptestigimizdi odan ári bekemdeı túsýde, — dedi Erlan Qoshanov.
Májilis tóraǵasy Mońǵolııa basshysyna Qazaqstanda jańa Konstıtýtsııany qabyldaý aıasynda júrgizilip jatqan saıası reformalardyń júzege asý barysy týraly aıtyp berdi. Sonymen qatar Palata spıkeri Prezıdenttiń bıylǵy jyldyń tamyz aıyna parlamenttik saılaýlar kezeńin jarııalaǵanyn atap ótip, olardyń qorytyndysy boıynsha bir palataly Quryltaı qurylatynyn jetkizdi.
Parlamentaralyq baılanystardy damytý týraly aıtqan Erlan Qoshanov eki el depýtattary arasyndaǵy dostyq toptary men salalyq komıtetter jelisi boıynsha tyǵyz yntymaqtastyq baılanysqa erekshe nazar aýdardy. Kezdesýge qatysýshylar zań shyǵarý tájirıbesimen almasý, sonyń ishinde tsıfrlandyrý men jańa tehnologııalardy damytý máselelerin qamtıtyn baǵyttardy kúsheıtý qajettigi jóninde ortaq pikirge keldi.
Óz kezeginde Mońǵolııa Prezıdenti Ýhnaagıın Hýrelsýh qazaqstandyqtardy jańa Konstıtýtsııanyń qabyldanýymen jáne alda ótetin parlamenttik reformamen quttyqtady.
Mońǵolııa basshysy atap ótkendeı, Qazaqstan — Mońǵolııa úshin Ortalyq Azııadaǵy eń jaqyn seriktesterdiń biri jáne óńir memleketteri arasyndaǵy altyn kópir sanalady. Ol sondaı-aq bul sapar Qazaqstan men Mońǵolııa arasyndaǵy dostyq pen ózara tıimdi áriptestikti odan ári nyǵaıtýǵa, sonyń ishinde parlamenttik dıplomatııa baǵytynda jańa birlesken jobalarǵa jol ashatynyna senim bildirdi.
Kezdesý barysynda saýda-ekonomıkalyq, kólik-logıstıkalyq jáne mádenı-gýmanıtarlyq baılanystardy nyǵaıtý máseleleri de talqylandy.
Aıta keteıik, Qazaqstan men Mońǵolııa 13 qujatqa qol qoıdy.
