Májiliske Chernogorııa Prezıdenti keldi
ASTANA. KAZINFORM - Májiliste Palata spıkeri Erlan Qoshanovtyń Qazaqstanǵa resmı saparmen kelgen Chernogorııa Prezıdenti ıAkov Mılatovıchpen kezdesýi ótti. Bul eki el qarym-qatynasy tarıhyndaǵy memleket basshysy deńgeıindegi alǵashqy sapar. Taraptar parlamentaralyq is-árekettiń negizgi baǵyttaryn jáne ekijaqty yntymaqtastyqty keńeıtý perspektıvalaryn talqylady.
Mártebeli meımandy qarsy alǵan Májilis tóraǵasy Qazaqstan men Chernogorııa arasynda ózara senimge negizdelgen syndarly saıası dıalog qalyptasqanyna nazar aýdardy.
– Bıyl biz dıplomatııalyq baılanystardyń ornaǵanyna 20 jyl tolýyn atap ótemiz. Osy ýaqyt ishinde Astana men Podgorıtsa arasynda ózara senimdi saıası dıalog qalyptasty. Oǵan Sizdiń Qazaqstan Prezıdenti Qasym-Jomart Toqaevpen jeke kezdesýlerińiz yqpalyn tıgizdi. Búgingi birlesken málimdemede atap ótilgendeı, elderimiz osy seriktestik baılanystardy odan ári tereńdetýge múddeli. Parlament depýtattary retinde, biz oǵan zańnamalyq deńgeıde barynsha qoldaý kórsetýge ázirmiz, – dedi Palata spıkeri.
Erlan Qoshanov Chernogorııa Prezıdentine elimizde júrgizilip jatqan saıası reformalar týraly jáne jalpyulttyq referendýmda jańa Konstıtýtsııanyń qabyldanýy týraly aıtyp berdi. Nátıjesinde bıliktiń barlyq tarmaǵynyń jumysy túbegeıli qaıta júıelenip, bir Palataly Parlamentke kóshýdiń quqyqtyq negizi qalanyp jatyr. Halyq Keńesi jańa qoǵamdyq-saıası ınstıtýty qurylyp jatyr. Munyń bári qazaqstandyqtar tarapynan keńinen qoldaý tapqan Prezıdent Qasym-Jomart Toqaev reformalarynyń aýqymdy baǵdarynyń qorytyndysy boldy.
Parlamentaralyq baılanysqa toqtalǵan Májilis tóraǵasy Chernogorııa Parlamentiniń spıkerimen turaqty baılanysta ekenin aıtty. Ol Májiliste Skýpşınamen depýtattyq dostyq toby jumys isteıtinin aıta kelip, ekijaqty deńgeıde de, Parlamentaralyq odaq, EQYU Parlamenttik assambleıasy, Eýropa Keńesi Parlamenttik assambleıasy jáne basqa da parlamentaralyq alańdardaǵy baılanysty odan ári nyǵaıtýdy qoldaıtynyn jetkizdi.
Óz kezeginde ıAkov Mılatovıch qonaqjaılyq tanytqany úshin rızashylyǵyn bildirip, Podgorıtsanyń ekijaqty yntymaqtastyqty tereńdetýge nıetti ekenin aıtty. Ol Chernogorııa Qazaqstanda júrgizilip jatqan ózgeristerdi joǵary baǵalaıtynyn, parlamentaralyq dıalogty, sondaı-aq birlesken ekonomıkalyq jáne mádenı-gýmanıtarlyq jobalardy jan-jaqty qoldaýǵa daıyn ekenin atap ótti.
Sonymen qatar kezdesý barysynda taraptar týrızm, tsıfrlandyrý, kólik, logıstıka, densaýlyq saqtaý salalaryndaǵy birlesken jobalardy iske asyrý, saýda-ınvestıtsııalyq baılanystardy damytý máselesin ortaǵa saldy.
