Májilis zııatkerlik menshikti qorǵaıtyn quqyqtyq tásilderdi talqylaıdy
ASTANA. KAZINFORM – Búgin Májilistiń jalpy otyrysy ótedi. Otyrysta palatanyń Halyqaralyq ister, qorǵanys jáne qaýipsizdik komıteti bir zań jobasyn qorytyndy ázirleýge alsa, depýtattar jalpy eki zańdy birinshi oqylymda talqyǵa salady.
Aıta keteıik, ótken jumada, 18 sáýir kúni Májilis spıkeri Erlan Qoshanovtyń tóraǵalyǵymen bıýro otyrysy bolyp, onda búgingi palata jalpy otyrysynyń kún tártibi naqtylanǵan edi.
Aldymen depýtattardyń talqylaýyna Memleket basshysynyń 2023 jylǵy 1 qyrkúıektegi «Ádiletti Qazaqstannyń ekonomıkalyq baǵdary» atty Qazaqstan halqyna Joldaýyn iske asyrý aıasynda ázirlengen zııatkerlik menshik máseleleri boıynsha zań jobasy birinshi oqylymda qaraý úshin engiziledi. Aıta keterligi, Prezıdent sol Joldaýynda elimizde kreatıvti ekonomıkanyń jan-jaqty damýyna barlyq jaǵdaıdy jasaýymyz keregin, onyń ishinde, zııatkerlik menshikti qorǵaıtyn quqyqtyq tásilder qajettigin basa aıtqan edi.
- Zııatkerlik menshik degenimiz – qural-jabdyq nemese tehnologııa sııaqty kádimgi múlik. Qazir kreatıvti ındýstrııa ortalyqtary 3 iri qalada (Astana, Almaty, Shymkent) shoǵyrlanǵan, óńirler nazardan tys qalyp otyr. Bul ahýaldy túzeý qajet. Daryndy azamattardy ózine tartatyn oryndar, ıaǵnı kreatıvti ındýstrııa ortalyqtary barlyq oblys ortalyǵynda bolýǵa tıis. Onda kreatıvti adamdardyń óz ónimin kommertsııalandyrýyna kómek kórsetilýi kerek. Kreatıvti ındýstrııa sýbektileri óndiris ereksheligine baılanysty kásipkerlikti qoldaý baǵdarlamalaryna tolyq qatysa almaıdy, qarjylaı kómek te ala almaıdy. Olarǵa qoldaý kórsetýge arnalǵan sharalardyń jeke toptamasyn ázirleý qajet dep sanaımyn, - degen bolatyn Qasym-Jomart Toqaev.
Úkimet ázirlegen zań jobada zııatkerlik menshikti qorǵaý men onyń quqyqtaryn qamtamasyz etý, zııatkerlik menshikti damytýǵa qolaıly jaǵdaı jasaý, ınvestıtsııalar tartý jáne kreatıvti ekonomıkany damytý úshin qosymsha quqyqtyq quraldar qarastyrylǵan. Zań jobasy boıynsha negizgi baıandamany Ádilet mınıstri Erlan Sársenbaev jasap, depýtattar tarapynan qujatqa qatysty qoıylatyn saýaldarǵa jaýap beredi.
Sondaı-aq, jalpy otyrystyń kún tártibiniń jobasyna depýtattardyń bastamasymen ázirlengen orman sharýashylyǵy jáne erekshe qorǵalatyn tabıǵı aýmaqtar máseleleri boıynsha zań jobasyn birinshi oqylymda qaraý usynylady. Bul zań jobasy boıynsha Parlament Senaty Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń hatshysy Olga Býlavkına negizgi baıandama jasaıdy.
Depýtattyq túzetýler sýarmaly aýyl sharýashylyǵy alqaptaryn, aýyl sharýashylyǵy, bıologııalyq, ırrıgatsııalyq-melıoratıvtik jáne balyq sharýashylyǵy salasyndaǵy ǵylymı-zertteý jáne oqý oryndarynyń tájirıbelik alqaptarynyń, sondaı-aq orman jáne sý qorlarynyń jerlerin erekshe strategııalyq mańyzy bar sý sharýashylyǵy qurylystary men sel, kóshkin, laı kóshkininen qorǵaý qurylystaryn salý jáne paıdalaný úshin alyp qoıýǵa ruqsat berýdi kózdeıdi.
Sonymen qatar aýyldyq eldi mekenderdiń jáne/nemese áleýmettik, ınjenerlik ınfraqurylym nysandaryn ornalastyrý maqsatymen erekshe qorǵalatyn tabıǵı aýmaqtardyń jerlerin, ınjenerlik jáne kommýnaldyq qamtamasyz etý jelileriniń kommýnıkatsııalaryn salý úshin memlekettik orman qorynyń jerlerin basqa sanattaǵy jerlerge aýystyrýǵa ruqsat berýdi kózdeıdi.
Ádettegideı, ár zań depýtattar tarapynan talqylanyp bolǵannan keıin negizgi baıandamashylar BAQ ókilderiniń aldyna shyǵyp, tilshiler tarapynan týyndaǵan saýaldarǵa jaýap beredi. Al Májilistiń jalpy otyrysynyń kún tártibine shyǵarylǵan máseleler qaralyp bolǵannan soń depýtattar Úkimet músheleriniń atyna depýtattyq saýaldar joldaýy múmkin.
Aıta keteıik, Májilistiń ótken aptadaǵy jalpy otyrysynda depýtattar 3 zańdy birinshi oqylymda, al 2 zańdy ekinshi oqylymda talqylady.
Nátıjesinde Májilis endaýment qor týraly zań jobasyn birinshi oqylymda maquldap, «Aýmaqtyq qorǵanys týraly» Zań men osy qujatqa ilespe zańdy qabyldady.
Al birinshi oqylymda maquldanǵan «Qazaqstan Respýblıkasynyń keıbir zańnamalyq aktilerine ishki ister organdarynyń qyzmeti salasyndaǵy normalardyń artyq zańnamalyq reglamenttelýin bolǵyzbaý máseleleri boıynsha ózgerister men tolyqtyrýlar engizý týraly» zań jobasy aıasynda ákimshilik qamaýǵa alynatyn adamdardy qabyldaý-bólý oryndarynda ustaý tártibi aıqyndalyp, «jergilikti polıtsııa qyzmeti» degen uǵym alynyp tastalmaq.
Jalpy otyrystyń kún tártibine shyǵarylǵan zań jobalary qaralyp bitkennen keıin birqatar depýtat Úkimetke saýaldaryn joldady. Atap aıtqanda, Azat Perýashev offshorlyq aımaqtardan kapıtaldy qaıtarý úshin raqymshylyq jarııalaýdy usynsa, Tilektes Adambekov KazSat-2 jáne KazSat-3 spýtnıkteriniń ahýalyna alańdaýshylyq tanytty.