Májilis zııatkerlik menshikti damytýǵa jaǵdaı jasaıtyn qujatty maquldady
ASTANA. KAZINFORM — Búgin Parlament Májilisiniń jalpy otyrysynda «QR keıbir zańnamalyq aktilerine zııatkerlik menshik máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Zań jobasy zııatkerlik menshikti qorǵaý boıynsha qosymsha quqyqtyq tásilderdi engizý arqyly zııatkerlik menshik salasyndaǵy zańnamany jetildirýge baǵyttalǵan. Túzetýler eki kodekske jáne bes salalyq zańǵa engiziledi
— Túzetýlerdiń negizgi baǵyttaryna toqtalsaq, habar taratý uıymdarynyń quqyqtaryn naqtylaý eskerilgen. Avtorlyq quqyq týraly zańdy Rım konventsııasynyń erejelerine sáıkestendirý úshin habar taratý uıymynyń aıryqsha quqyqtary men avtorlyq jáne sabaqtas quqyqtardy buzý tizbesinde naqtylaý engiziledi (40, 48-baptar). Ekinshiden, zańdy (avtorlyq quqyq týraly) Marrakesh shartyna sáıkestendirý úshin erkin, ıaǵnı jarııa etilgen týyndylardy shartsyz paıdalaný engiziledi. Avtordyń nemese quqyq ıesiniń kelisiminsiz týyndylardy Braıl shrıftimen nemese kórý qabileti shekteýli adamdarǵa týyndylarǵa qol jetkizýdi qamtamasyz etý úshin basqa da tásildermen jańǵyrtýǵa (taratý, jalpyǵa birdeı nazarǵa jetkizý, jarııa kórsetý quqyǵy) ruqsat etiledi, — dedi Ádilet mınıstri Erlan Sársembaev.
Budan bólek, zań jobasy aıasynda ótinim berýshiniń ótinishi boıynsha taýar belgilerine jedel saraptama engizý usynyldy. Qazir taýar belgilerine ótinimder boıynsha saraptama merzimi ótinim bergen kúnnen bastap jeti aıdy quraıdy, bul merzimdi qysqartý múmkindigi joq. Jedel saraptama taýar belgilerin quqyqtyq qorǵaýdy úsh aı ishinde (jeti aıdyń ornyna) alýǵa múmkindik beredi, bul ásirese joǵary básekelestik kezinde, onyń ishinde elektrondyq kommertsııada jumys isteıtin shaǵyn jáne orta bıznes sýbektileri úshin ózekti.
— Budan bólek, taýar belgileri ıeleriniń nemese múddeli tulǵalardyń quqyqtaryn qorǵaý úshin taýar belgisi retinde tirkeýge málimdelgen belgilerge qarsylyqtardy jiberý merzimin bir aıdan eki aıǵa uzartý usynyldy. Qarsylyqtardy berýge qosymsha ýaqyt taýar belgilerine ótinimderdi qaraýdyń ákimshilik tetiginiń tıimdiligin arttyrady, sondaı-aq sottaǵy jáne sotqa deıingi shaǵymdar sanyn azaıtady, — dedi mınıstr.
Sondaı-aq ol Patent zańyna formaldi saraptama júrgizý kezinde is júrgizýdi toqtatýǵa qatysty túzetýler engiziletinin aıtty.
— Eger formaldi saraptama júrgizý barysynda málimdelgen usynys ónertabys retinde tanylmaıtyn sheshimder qataryna jatsa, onda patent berýden bas tartý týraly sheshim qabyldanady, ol týraly ótinish berýshige bes jumys kúni ishinde habarlanatyn bolady. Munymen qosa, patenttik senim bildirilgen ókilderdiń qyzmet sapasyn qamtamasyz etýde olardyń qyzmetin daralandyrý quraldary men patentteý obektilerine qatysty saralaý engizý usynylady. Bul tásil ulttyq retteýdi halyqaralyq praktıkamen úılestirýge yqpal etedi. Ótinish berýshiler men shetel azamattarynyń Qazaqstan Respýblıkasynyń patenttik senim bildirilgen ókilder ınstıtýtyna degen senimin nyǵaıtady. Atap aıtqanda, Memleket basshysy Qasym-Jomart Toqaev óz sózinde ınvestıtsııalyq ahýaldy jáne bıznesti júrgizý úshin jaǵdaılardy jaqsartý boıynsha jumystyń mańyzdylyǵyn birneshe ret atap ótti. Zııatkerlik menshik quqyqtaryn qorǵaý jáne saqtaý eldiń ınvestıtsııalyq tartymdylyǵyna tikeleı áser etedi. Zııatkerlik menshik salasyn damytý kreatıvti ekonomıkaǵa jáne turaqty ınnovatsııalyq ósýge kóshýdiń negizgi faktorlarynyń biri retinde qarastyrylady, — dedi vedomstvo basshysy.
Eske salsaq, jaqynda zııatkerlik menshik, avtorlyq quqyq salasynda Qazaqstan Meta-men tájirıbe almasatynyn jazǵan edik.