Májilis jolaýshylardy avtokólikpen tasymaldaý salasyna ózgerister engizdi
ASTANA. KAZINFORM – Búgin Májilistiń jalpy otyrysynda. «Qazaqstan Respýblıkasynyń keıbir zańnamalyq aktilerine jolaýshylardy avtomobılmen tasymaldaý salasyndaǵy keıbir memlekettik fýnktsııalardy mindetti múshelikke (qatysýǵa) negizdelgen ózin-ózi retteýge berý máseleleri boıynsha ózgerister men tolyqtyrýlar engizý týraly» zań jobasy birinshi olqylymda maquldandy.
«Zań jobasy ózin-ózi retteýge turaqty halyqaralyq, oblysaralyq, turaqty emes avtobýs tasymaly, taksı jáne olarǵa qatysty dıspetcherlik jumysty, sondaı-aq depýtattar usynysymen avtobeket qyzmetterin uıymdastyrý fýnktsııasyn berýdi kózdeıdi. Sonymen qatar, zań jobasy – ózin-ózi retteýdi qurý, onyń músheleriniń quqyqtary men mindetteri, múshelik jarnanyń mólsheri, ózin-ózi retteý uıymyn tizilimge qosý nemese alyp tastaý tártibi, sondaı-aq múliktik jaýaptylyq máselelerin reglamentteıdi. Mınıstrlik osy másele boıynsha jumysty 2020 jyly bastady jáne onyń aıasynda qajet qoǵamdyq tyńdaýlardy ótkizdi, tıisti taldaýlardy júrgizdi, halyqaralyq tájirıbelerdi zerdeledi», - dedi Kólik mınıstri Marat Qarabaev.
Zań jobasynda eskerilgen fýnktsııalardy ózin-ózi retteýge berý:
- tasymal protsesin baqylaýdy memlekettik deńgeıden ózin-ózi retteýdiń ishki uıymdastyrýshylyq deńgeıine aýystyra otyryp, osy naryqta qyzmet kórsetýshilerdiń jumys sapasyn óz múshesi retinde baqylaýǵa múmkindik beredi;
- kásibı álsiz tasymaldaýshylardy ózdiginen tasymal naryǵynan shyǵaratyn adal básekelestikke negizdelgen odaqta qyzmet atqarýǵa jaǵdaı jasaıdy;
- naryqtyń negizgi talaptaryn eskere otyryp ýákiletti organ anyqtaǵan basty baǵyttardy damytýǵa beıimdelgen sapaly standarttar men qaǵıdalardy jedel qabyldaýǵa múmkindik jasaıdy;
- saladaǵy bıýrokratııa men sybaılas jemqorlyq saldaryn azaıta kele, qoǵamdyq baqylaý tetigin damytýdy qamtamasyz etedi.
«Damyǵan elderde ózin-ózi retteý ekonomıkanyń barlyq salasynda oryn alǵan. Halyqaralyq tájirıbe – salanyń ózin-ózi retteýge ótýiniń tıimdiligin kórsetedi, óıtkeni tek bir salanyń máselesimen aınalysatyn bilikti sarapshylary bar jeke uıymnyń bolýy osy salanyń qarqyndy túrde damýyn qamtamasyz ete alady. Máselen, ózin-ózi retteý Amerıkada 1934 jyldan bastap kásipkerliktiń barlyq sektorynda, tipti densaýlyq salasynda da jumys isteıdi. Anglııada 1889 jyly júk tasymal qaýymdastyǵy qurylǵan, ol qazirgi kúni eldegi júk kólik parkiniń jartysyn, sondaı-aq temirjolmen 90% júkti, al teńiz kóligimen 70% júkti tasymaldaıtyn operatorlardy biriktiredi. Kórshi elderde ózin-ózi retteýde Reseı kóshbasshy bolyp otyr. Ol elde 2007 jyly «Ózin-ózi retteý týraly» zań qabyldanyp «táýelsiz baǵalaý», «tórelik basqarý», «sáýlet-qurylys/kadastr», «avtókólikpen halyqaralyq júk tasymaly» ózin-ózi retteýge ótti. 2018 jyldan bastap elimizde de mindetti múshelikpen ózin-ózi retteý «táýelsiz baǵalaý» jáne «zań konsýltanttary» salasynda engizilip, qazir óz qyzmetin tıimdi atqaryp jatyr», - dedi mınıstr.
Zań jobasynda «Kólik týraly», «Avtomobıl kóligi týraly», «Astananyń mártebesi týraly», «Ruqsattar jáne habarlamalar týraly», «Keıbir zańnamalyq aktilerge áleýmettik máseleler boıynsha ózgerister men tolyqtyrýlar engizý týraly» zańdarǵa túzetýler men tolyqtyrýlar engizý kózdelgen.
