Májilis jeke tulǵanyń bir ýaqytta birneshe bankte kredıt resimdeýine shekteý engizdi

ASTANA. KAZINFORM — Búgin Májilistiń jalpy otyrysynda «Qazaqstan Respýblıkasyndaǵy bankter jáne bank qyzmeti týraly» zań jáne oǵan ilespe qujat ekinshi oqylymda qabyldandy. 

Zań jobasy bankter ashý jáne lıtsenzııalaý tártibine qoıylatyn talaptardy keńeıtýge; bank qyzmetine qoıylatyn talaptardy, bankterge ruqsat etiletin ınvestıtsııalyq jáne ózge de qyzmetti belgileýge, sondaı-aq enshiles uıymdardy retteýdi jetildirýge; bankterdi korporatıvtik basqarý qaǵıdattaryn aıqyndaýǵa; ıslamdyq bank qyzmetin keńeıtýge; bank qyzmetterin tutynýshylardyń quqyqtaryn qorǵaýǵa qoıylatyn talaptardy jetildirýge; tólemge qabiletsiz bankti retteý tetikterin damytýǵa baǵyttalǵan normalardy qamtıdy.

Jumys toby aıasynda depýtattar mynalardy:

— bir jeke tulǵanyń bir ýaqytta birneshe bankte kredıt resimdeýine shekteý engizýdi;

— alǵash ret kredıt alǵan kezde bıometrııalyq sáıkestendirýdi ótý úshin qaryz alýshynyń bankke jeke óziniń kelýin;

— klıenttiń kelisimi bolǵan jáne shyǵarý kezinde mindetti bıometrııadan ótken kezde ǵana bankterdiń elektrondyq tsıfrlyq qoltańba jasaýy men shyǵarýyna jol berýdi;

— júıelik mańyzy bar bankke qoıylatyn talaptardy kúsheıtýdi jáne onyń memleketke keltirilgen shyǵyndardy óteýge qatysýyn;

— qarjy tehnologııalaryn damytý sheńberinde bankter men olardyń enshiles uıymdarynyń ınvestıtsııalyq qyzmetin keńeıtýdi;

— azamattardy alaıaqtyqtan qorǵaý jáne kredıttik skorıngtiń sapasyn arttyrý úshin jasandy ıntellektini paıdalanýdy;

— Qarjy ombýdsmanynyń problemalyq bereshekti retteý kezinde tek qana jeke tulǵalardyń daýlaryn sheshý fýnktsııalaryn bekitýdi;

— qaryz alýshynyń Qarjy ombýdsmanynyń ujymdyq retteýdiń aqparattyq platformasy arqyly bereshekti ujymdyq retteýge júginý múmkindigin bekitýdi kózdeıtin túzetýlerdi engizdi.

— Memlekettik tsıfrlyq aktıvterdi basqarý tıimdiligin arttyrý maqsatynda Ulttyq strategııalyq krıptorezerv qurý kózdelgen. Bul tetik memleketke tsıfrlyq aktıvterdi qaýipsiz esepteý jáne saqtaýǵa, sonymen qatar memlekettik resýrs kiristiligin arttyrady. Biryńǵaı QR kod pen bankaralyq mobıldi tólemder júıesin engizý jónindegi norma zańnamalyq turǵyda bekitiledi. Bul bankter arasyndaǵy ózara is-qımyl deńgeıin arttyryp, yńǵaılylyqty qamtamasyz etedi jáne azamattar úshin tólem servısteriniń qoljetimdiligin keńeıtedi, — dedi Májilis depýtaty Tatıana Saveleva.

Aıta keteıik, búgingi otyrysta elimizdiń Qurylys kodeksi, «Qazaqstan Respýblıkasynyń keıbir zańnamalyq aktilerine sáýlet, qala qurylysy jáne qurylys máseleleri boıynsha ózgerister men tolyqtyrýlar engizý týraly» zańnyń jobasy ekinshi oqylymda qabyldandy.