Májilis jedel járdem qyzmetkerlerin qorǵaýǵa arnalǵan qujatty maquldady
ASTANA. KAZINFORM — Búgin Parlament Májilisiniń jalpy otyrysynda «QR Qylmystyq kodeksine jáne Qazaqstan Respýblıkasynyń qylmystyq is júrgizý kodeksine tolyqtyrýlar engizý týraly» zań jobasy birinshi oqylymda maquldandy.
— Qylmystyq kodekske jańa 380-3-babyn engizemiz. Ol «medıtsına qyzmetkeri» jáne «jedel medıtsınalyq járdem júrgizýshisi» degen arnaıy sýbektini belgileıdi, — dedi A. Aımaǵambetov.
Bul turǵyda Májilis depýtattary adamdardyń ómirin qutqaratyn aq halatty jandarǵa da dál qoryqshylarǵa berilgendeı qorǵaý men jaýapkershilik tetikterin engizýdi usyndy. Qoldanystaǵy zańnama aıasynda qoryqshynyń densaýlyǵyna zaqym keltirgen qylmysker arnaıy bap boıynsha qatań jazalanady.
— Medıtsına qyzmetkerlerine qarsy qylmystyń ereksheligi nede? Qylmysker dárigerdi soqqyǵa jyqqanda, tek dárigerdiń jeke basyna zııan keltirmeıdi. Ol — ult saýlyǵyn qamtamasyz etetin qoǵamdyq qatynastardy buzady. Hırýrg mysalyna qaıta oralaıyq. Eger buzaqy tóbeleste adamnyń saýsaǵyn syndyrsa, bul ortasha aýyrlyqtaǵy zııan. Alaıda, eger ota jasaıtyn hırýrgtiń, nemese neırohırýrgtiń saýsaǵyn syndyrsa — bul naǵyz apat. Hırýrgtiń qoly — qutqarý quraly. Sol saýsaqtyń kesirinen myńdaǵan ota toqtaıdy. Onyń kómegin ala almaǵan myńdaǵan adam zardap shegedi. Jazanyń qatań bolý sebebi de — osy. Aýrýhananyń qabyldaý bólimine kelsek — ol jyly ári jaıly keńse emes. Ol jerge bárin ákeledi: kishkentaı balalar men ınsýlt alǵan qarııalardy da, krımınaldyq tóbelesten keıin pyshaqtalǵandar keledi. Sondyqtan bul jer qaýipsiz bolýy tıis, — dedi depýtat.
Sonymen qatar ol jedel járdem qyzmetkerleri de orasan zor qaýip-qater jaǵdaıynda jumys isteıtinin aıtty.
— Eger biz Qylmystyq kodeks arqyly bılik ókilin, orman ınspektoryn, prokýror men sotty, polıtseıdi qorǵasaq, onda naýqastarǵa kómekke baratyn dárigerdi de qorǵaýǵa mindettimiz, — dedi Ashat Aımaǵambetov.
Eske salsaq, bıyl jazda Qostanaıda dárigerdi soqqyǵa jyqqan buzaqy eki aıǵa qamaýǵa alyndy.
Sonymen qatar, maýsym aıynda Qaraǵandy oblysynda er adam eki dárigerdi soqqyǵa jyqqany málim boldy.