Májilis jasandy ıntellekt týraly úsh zańnyń jobasyn maquldady
ASTANA. KAZINFORM – Májilis depýtattary «Jasandy ıntellekt týraly» negizgi zań men eki ilespe zańnyń jobalaryn birinshi oqylymda maquldady.
Baıandamashy depýtat Ekaterına Smyshlıaevanyń sózinshe, negizgi zań jobasy 7 taraýdan jáne 28 baptan turady . Qujatta mynadaı jańshyldyqtar bar:
- jasandy ıntellekt salasyndaǵy retteýdiń, ashyqtyq pen qaýipsizdikti qamtamasyz etýdiń quqyqtyq jáne uıymdastyrýshylyq negizderin bekitedi;
- memlekettik organdar men kvazımemlekettik uıymdardyń jasandy ıntellekt tehnologııalaryn paıdalaný erekshelikterin aıqyndaıdy;
- Úkimettiń jasandy ıntellekt salasyndaǵy memlekettik saıasatty qalyptastyrýdaǵy quzyreti keńeıtiledi;
- jasandy ıntellekt salasyndaǵy qatynastar sýbektileriniń quqyqtary men mindetteri naqtylanady.
Al ilespe zańdardyń biri qoldanystaǵy zańnamany osy Jasandy ıntellekt týraly negizgi zańmen sáıkestendirýge arnalǵan.
Munda:
- jasandy ıntellektti paıdalana otyryp jasalǵan ónimderge qatysty tutynýshylardyń quqyqtaryn qorǵaýǵa;
- jasandy ıntellekt júıeleri paıdalanatyn derbes derekterdi qorǵaýǵa;
- ulttyq jasandy ıntellekt platformasynyń jumys isteý maqsattary úshin elektrondyq aqparattyq resýrstarǵa qoljetimdilikti aıqyndaýǵa;
- jasandy ıntellekt júıelerimen qurylǵan buqaralyq aqparat quraldary ónimderiniń taralý qaýipsizdigin qamtamasyz etýge jáne jalǵan aqparattyń manıpýlıatsııasy men taralýyn boldyrmaýǵa baǵyttalǵan baptar bar.
Taǵy bir ilespe zań jobasy Ákimshilik quqyq buzý týraly kodekske jasandy ıntellekt máseleleri boıynsha túzetýler men ózgerister engizýdi kózdeıdi.
Bul qujat boıynsha jasandy ıntellektpen aınalysatyn tulǵalarǵa ákimshilik jaza kesiletin eki jaǵdaı kórsetilgen.
Naqtyraq aıtsaq:
- jasandy ıntellekt júıesine ıelik etýshiler paıdalanýshylardy ózi usynatyn generatıvti júıeniń qyzmetinde adamdy jańylystyrýy múmkin detalder bar ekenin jarııa túrde eskertpese;
- jasandy ıntellekt júıesiniń ıeleri adamdardyń densaýlyǵyna nemese ál-aýqatyna teris áser etken jasandy ıntellekt júıeleriniń táýekelderin basqarýsyz qaldyrsa, ákimshilik jaýapkershilikke tartylady.
Buǵan deıin Qazaqstanda qaı salaǵa jasandy ıntellekt belsendi engizilip jatqanyn jazǵan edik.