Májilis jańartylatyn energııa salasyna qatysty mańyzdy qujatty qabyldady
ASTANA. KAZINFORM — Búgin Májilistiń jalpy otyrysynda «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy jańartylatyn energııa kózderi salasyndaǵy jobalardy iske asyrý týraly kelisimdi ratıfıkatsııalaý týraly» Zań qabyldandy.
2024 jylǵy 12 qarashada halyqaralyq klımattyq COP-29 forýmy aıasynda osy Kelisimge qol qoıyldy. Atalǵan kelisim turaqty jáne «jasyl» energetıka salasyndaǵy ekijaqty yntymaqtastyqty damytýǵa baǵyttalǵan.
- Kelisimniń maqsaty – uzaq merzimdi ári ózara tıimdi yntymaqtastyqty damytý, energııa óndirý men jınaqtaýdyń zamanaýı tehnologııalaryn engizý, sondaı-aq Qazaqstan óńirleriniń turaqty áleýmettik-ekonomıkalyq damýyna járdemdesý. Qujat aıasynda jalpy ornatylǵan qýaty 1,8 GVt bolatyn jańartylatyn energetıka salasyndaǵy úsh iri ınvestıtsııalyq jobany iske asyrý kózdelgen. Onyń ishinde jıyntyq qýaty 1,5 GVt bolatyn eki jel elektr stantsııasyn jáne qýaty 300 MVt bolatyn bir kún elektr stantsııasyn salý josparlanyp otyr. Atalǵan jobalar memleketaralyq yntymaqtastyq aıasynda elimizde júzege asyrylyp jatqan JEK salasyndaǵy eń aýqymdy jobalardyń qataryna jatady, - dedi Energetıka mınıstri Erlan Aqkenjenov.
Jobalardy Pavlodar, Qaraǵandy jáne Túrkistan oblystarynyń aýmaǵynda iske asyrý josparlanǵan. Bul óńirlerdiń tańdalýy jel jáne kún resýrstarynyń joǵary áleýetimen, sondaı-aq jańa generatsııalaıtyn qýattardy Qazaqstannyń Biryńǵaı elektr energetıkalyq júıesine ıntegratsııalaý múmkindiginiń bolýymen negizdelgen. Barlyq joba qajet energetıkalyq ınfraqurylymdy qurýdy, onyń ishinde elektr jelilerine qosylý obektilerin salýdy jáne elektr energııasyn jınaqtaý júıelerin engizýdi kózdeıdi.
- Jobalardy iske asyrýǵa salynatyn ınvestıtsııalardyń jıyntyq kólemi 2,2 mlrd AQSh dollaryn quraıdy. Qarjylandyrý halyqaralyq qarjy ınstıtýttary men bankterdiń qatysýymen júzege asyrylatyn bolady, bul ınvestorlardyń Qazaqstannyń energetıka sektoryna degen joǵary senimin kórsetedi. Jobalardy iske asyrý aıtarlyqtaı áleýmettik-ekonomıkalyq áser beredi, onyń ishinde shamamen 2 000 ýaqytsha jáne 204 turaqty jumys ornynyń qurylýy, sondaı-aq ekonomıkanyń sabaqtas salalarynyń damýy qamtamasyz etiledi. Energetıkalyq jáne ekologııalyq turǵydan alǵanda, jobalar jyl saıyn 5,7 mlrd kVt·saǵattan astam «jasyl» elektr energııasyn óndirýge múmkindik beredi, kómirqyshqyl gazynyń shyǵaryndylaryn jylyna 4,5 mln tonnaǵa deıin qysqartýǵa yqpal etedi. Bul elimizdiń klımattyq maqsattaryna qol jetkizýge óz úlesin qosady. Sonymen qatar «Samuryq-Energo» AQ-nyń qosalqy ınvestor retinde qatysýy ulttyq múddelerdiń eskerilýin jáne jańartylatyn energetıka salasyndaǵy otandyq mamandardyń biliktiligin damytýdy qamtamasyz etedi, - dedi mınıstr.
Qazirgi ýaqytta jobalar jobalyq izdestirý jumystarynan bastap, negizgi ınvestıtsııalyq jáne sharttyq qujattardy daıyndaý kezeńine deıingi ártúrli iske asyrý satylarynda tur. Osyny eskere otyryp, Kelisimdi ratıfıkatsııalaý aýqymdy ınvestıtsııalyq jobalardy iske asyrý úshin quqyqtyq negiz qalyptastyrady.
Budan buryn habarlanǵandaı, Qazaqstanda 2050 jylǵa qaraı jańartylatyn energııa kózderiniń úlesi 50%-ǵa jetedi.