Májilis jańa zań jobalaryn jumysqa alady
ASTANA. KAZINFORM – Búgin Májilistiń jalpy otyrysy ótedi. Onda depýtattar birqatar halyqaralyq qujatty ratıfıkatsııalaýǵa qatysty zańdardy qarap, jańa zań jobalaryn jumysqa alady.
Esterińizge sala ketsek, 12 qańtarda Májilis spıkeri Erlan Qoshanovtyń tóraǵalyǵymen bıýro otyrysy ótip, búgingi otyrystyń kún tártibi naqtylanǵan edi. Soǵan oraı depýtattarǵa halyqaralyq qujattardy ratıfıkatsııalaýǵa qatysty birqatar zań jobasyn qaraý usynylady.
Olardyń qatarynda 2023 jylǵy 4 jeltoqsanda Máskeýde qol qoıylǵan Eýrazııalyq ekonomıkalyq odaqtyń kedendik aýmaǵynan áketiletin taýarlardyń shyǵarylǵan jerin aıqyndaýdyń úılestirilgen júıesi týraly kelisim bar. Bul qujat taýarlardyń shyǵý tegin aıqyndaý jáne rastaý máselelerinde múshe memleketterdiń tásilderin birizdendirýge baǵyttalǵan. Ol baqylaýdyń biryńǵaı qaǵıdalaryn qamtamasyz etip, qazaqstandyq ónimniń sur reeksport shemalarynyń aldyn alýǵa múmkindik beredi.
Sondaı-aq 2024 jylǵy 8 mamyrda Máskeýde qol qoıylǵan Eýrazııalyq ekonomıkalyq odaqtyń tehnıkalyq reglamentteriniń saqtalýyn memlekettik baqylaý jónindegi hattamany ratıfıkatsııalaý týraly zań jobasyn qaraý josparlanyp otyr. Bul qujat yqtımal syn-qaterlerdi azaıtýdy kózdeıdi.
Budan bólek, Májilis memlekettik qyzmet, Alataý qalasynyń arnaıy mártebesi, ınvestıtsııalyq qorlar, mashına jasaý salasyn damytý, jol qaýipsizdigin tsıfrlandyrý, sondaı-aq júrgizýshilerdi daıarlaý salasyndaǵy kásipkerlik qyzmetke qatysty jańa zań jobalaryn jumysqa qabyldaıdy.
2024 jyly Memlekettik qyzmet isteri agenttiginiń tóraǵasy Darhan Jazyqbaı «Memlekettik qyzmet týraly» jańa zań jobasy daıyndalatynyn aıtqan bolatyn.
Onyń atap ótýinshe, jańa zań jobasynyń negizgi maqsattarynyń biri – memlekettik qyzmettegi eńbek qatynastaryn retteýmen shektelmeı, qoǵam men memlekettik qyzmetshi arasyndaǵy ózara baılanysty zań deńgeıinde retteý. Zańnama irikteý júıesin jetildirýge, erte kásiptik baǵdarlaý jáne mansaptyq ósýdi gıbrıdtik modelderine saı jańa tetikterin engizý arqyly memlekettik apparatty kásibılendirýge baǵyttalady.
- Sondaı-aq qyzmetshiler rotatsııasyn keńeıtý, áleýmettik kepildikterin jaqsartý, tártiptik jaýapkershilikke tartý erejelerin de qaıta qaraý jáne jasandy ıntellekt elementterin qoldana otyryp, memlekettik qyzmet protsesterin tolyq tsıfrlandyrý josparlanǵan», - degen edi Darhan Jazyqbaı.
Al ótken jyldyń aqpan aıynda Memleket basshysy Qasym-Jomart Toqaev agenttik tóraǵasy Darhan Jazyqbaıdy qabyldap, oǵan «Memlekettik qyzmet týraly» jańa zań jobasyn ázirleýge jáne Memlekettik qyzmetti damytýdyń 2024-2029 jyldarǵa arnalǵan tujyrymdamasyn júzege asyrýǵa qatysty birqatar tapsyrma berdi. Sonymen qatar Qasym-Jomart Toqaev memlekettik apparattyń tıimdiligin arttyrý úshin zamanaýı HR-quraldaryn engizý mańyzdy ekenine nazar aýdardy.
«Alataý qalasynyń arnaıy mártebesi týraly» konstıtýtsııalyq zań jobasyn Ulttyq ekonomıka mınıstrligi ázirlegen. Zań jobasy qalany basqarýdyń tıimdi júıesin qalyptastyrýǵa, tsıfrlyq jáne ınnovatsııalyq tehnologııalardy engizýge, zamanaýı halyqaralyq standarttardy qoldanýǵa, sondaı-aq qala qurylysy, áleýmettik, ekologııalyq jáne ınvestıtsııalyq úderisterdi retteýge baǵyttalǵan.
Alataý qalasynyń arnaıy mártebe aıasynda jumys isteýi, onyń damýy men qalalyq úderisterdi retteý tómendegi negizgi mindetterdi iske asyrýdy kózdeıdi:
- Alataý qalasyn halyqaralyq mańyzy bar ekonomıkalyq, tehnologııalyq, ǵylymı-bilim berý, saýda-oıyn-saýyq jáne ınvestıtsııalyq ortalyq retinde qalyptastyrýǵa jaǵdaı jasaý;
- adamı kapıtaldy, ınvestıtsııalar men tehnologııalardy jedel tartý jáne damytýǵa múmkindik beretin derbes quqyqtyq jáne ákimshilik rejımdi qalyptastyrý ári uzaq merzimdi saqtap turý;
- Alataý qalasyn damytýǵa salynatyn ınvestıtsııalardyń quqyqtyq qorǵalý kepildigin kúsheıtý;
- «Aqyldy qala» qalyptastyrý jáne ekonomıkalyq damýdy qamtamasyz etý maqsatynda ǵylym men tehnıkanyń ozyq jetistikterin, tehnologııalyq ınnovatsııalar men zamanaýı tásilderdi qoldaný;
- qalalyq ortany basqarýdyń aldyńǵy qatarly retteýshi jáne jergilikti basqarý tájirıbelerin engizý.
Aıta keteıik, bul - Májilistiń bıylǵy alǵashqy otyrysy. Osy ýaqytqa deıin depýtattar óńirlerdi aralap, halyqtyń tynys-tirshiligimen, júzege asyrylyp jatqan jobalarmen tanysyp qaıtty.
Ótken jyly Májilis Memleket basshysynyń Joldaýlarynda, Saılaýaldy baǵdarlamasynda, Ulttyq quryltaıda bergen tapsyrmalary negizinde birqatar mańyzdy zańnamalyq aktilerdi qabyldady. Jalpy, palata byltyr 100 zań qabyldasa, onyń 24-ine depýtattar bastamashy boldy. Sondaı-aq, elimizdiń negizgi qujattary – Sý, Bıýdjet, Salyq, Qurylys jáne Tsıfrlyq kodekster boıynsha jumysty aıaqtady.
Depýtattar «Zań jáne tártip» qaǵıdatyn dáıekti túrde júzege asyra otyryp, birqatar mańyzdy normalar da qabyldady. Lýdomanııa boıynsha jańa normalar engizildi. Halyqty, sonyń ishinde jastardy qorǵaý úshin ǵımarattarda jáne onlaın-keńistikte býkmekerlik keńseler men totalızatorlardy jarnamalaýǵa tyıym salyndy.
Sonymen qatar, nekege turýǵa májbúrleý de zańmen retteldi. Bul qadam jeke tulǵanyń qadir-qasıetin, qalaýy men tańdaýyn jáne adamnyń quqyqtaryn qorǵaýǵa degen memlekettiń umtylysyn naqty kórsetti.
Telefon arqyly jasalatyn alaıaqtyqqa tosqaýyl qoıý úshin baılanys salasynda qatań sharalar qolǵa alyndy. Alaıaqtyq shemalarǵa qatysy bar tulǵalarǵa, ıaǵnı dropperlerge qylmystyq jaýapkershilik engizildi. Bir adamnyń atyna on abonenttik nómirden artyq resimdeýge shekteý qoıyldy. Alaıaqtyq maqsattaǵy telefon qońyraýlary úshin paıdalanylatyn nómirlerdi buǵattaý eskerildi.
Halyqtyń qaryzǵa batýyn azaıtýǵa baǵyttalǵan jumys júıeli jalǵasyn tapty. Qıyn qarjylyq jaǵdaıǵa tap bolǵan azamattardyń problemasyn sheshýge kómektesetin normalar qabyldandy. Halyqtyń áleýmettik turǵyda az qamtylǵan toptary úshin zaımdar men shaǵyn nesıeleri boıynsha merzimin keminde úsh aıǵa shegerý múmkindigi belgilendi. Kepilsiz onlaın nesıeler resimdeý kezinde «salqyn aqylǵa salyp» sheshim qabyldaýǵa mursat berý engizildi.
Áleýmettik salaǵa qatysty da birqatar zańnamalyq sheshim qabyldandy. Eń aldymen, balalardy qoldaýǵa basa nazar aýdarylyp otyr. Máselen, memleketten bilim kapıtaly qarastyrylǵan «Keleshek» júıesi iske qosyldy.
Buǵan qosa depýtattardyń bastamasymen daryndy balalardy qoldaýǵa baǵyttalǵan normalar engizildi. Endi halyqaralyq olımpıadalardyń jeńimpazdary bilim granttaryn konkýrssyz alady.
Onyń ishinde «Bolashaq» baǵdarlamasy da qamtylǵan. Sonymen qatar, memlekettik járdemaqy alýshylar I toptaǵy múgedektigi bar balalardyń nemese jeke tulǵalardyń kútimin jasaıtyn bolsa, granttar boıynsha mindetti jumyspen óteýden bosatylady.
Memleket basshysynyń tapsyrmasy aıasynda mindetti medıtsınalyq saqtandyrý júıesine qatysty tásilder de qaıta qaraldy. Biryńǵaı medıtsınalyq kómek paketi engizildi. Kúrdeli aýrýlardy erterek anyqtaý úshin tegin kórsetiletin kepildi medıtsınalyq kómek tizimine onkoskrınıng engizildi. Sondaı-aq, estý qabileti buzylǵan, biraq múgedektigi joq azamattarǵa qajetti estý protezi tegin beriletin bolady.