Májilis jańa Qurylys kodeksiniń jobasyn birinshi oqylymda maquldady
ASTANA. KAZINFORM – Búgin Parlament Májilisiniń jalpy otyrysynda Qurylys kodeksiniń jobasy men ilespe qujat birinshi oqylymda maquldandy.
QR Ónerkásip jáne qurylys mınıstri Ersaıyn Naǵaspaevtyń sózine qaraǵanda, Kodeks aıasynda qurylys jobalarynyń oryndalýyn qosymsha baqylaý úshin Memlekettik qala qurylysy kadastrynyń avtomattandyrylǵan aqparattyq júıesin engizý kózdelip otyr.
Sonymen qatar ulttyq qaýipsizdik pen ornyqty damýdy qamtamasyz etý maqsatynda jańa Qurylys kodeksinde seısmıkalyq máselege arnalǵan jeke taraý engiziledi. Normalar keshendi túrde seısmıkalyq qaterdi baǵalaýdy, jańa nysandardy seısmo-oqshaýlaý tehnologııasymen jobalaýdy, qurylys alańdaryn tańdaý men birinshi deńgeıdegi mańyzdy nysandarǵa ınjenerlik-seısmometrııalyq baqylaý júrgizýdi qarastyrady.
Qaýipti baǵalaý – aımaqtyń ereksheligi men nysandardyń sıpatyna qaraı yqtımal shyǵyndardy esepteý, táýekel kartalaryn jasaý, ǵımarattardyń tózimdiligin baǵalaý men qaýipti óńirlerdegi nysandardy tehnıkalyq pasporttaýdy qamtıdy. Bul jerde seısmıkalyq mıkroaımaqtarǵa bólý erekshe mańyzǵa ıe. Onyń kartalary qala qurylysyn josparlaý kezinde mindetti túrde paıdalanylatyn bolady. Sondyqtan, jańa Kodekske seısmıkalyq qaýipsizdik bólimin engizý strategııalyq mańyzdy qadam.
Budan bólek, taǵy bir ózekti másele ol – qazirgi attestattaý tártibi sarapshylar men ınjenerlerdiń naqty biliktilik deńgeıin tolyq ári tıimdi kórsete almaı otyr. Osyǵan baılanysty negizgi halyqaralyq tájirıbeni, sonyń ishinde Eýropa odaǵynyń ozyq tájirıbesine súıene otyryp, qurylys ınjenerlerin sertıfıkattaý júıesin engizý josparlanǵan.
Munymen qosa, saladaǵy normatıvtik bazany turaqty túrde jańartyp, zamanǵa beıimdeý maqsatynda jańa Qurylys kodeksinde tehnıkalyq normalaý júıesine erekshe nazar aýdaryldy. Kodeks aıasynda Ulttyq tehnıkalyq normalaý ınstıtýtyn qurý josparlandy. Ol normatıvtik-quqyqtyq bazany jetildirý isin óz qolyna alady.
Bul organ normatıvterdiń qalaı qoldanylyp jatqanyn baqylap, qajet bolǵan jaǵdaıda túsindirme beredi, jańa tehnologııalar men tájirıbelerdi eskerip, ózgerister usynady.
Budan basqa, qurylys, sáýlet, ınjenerlik júıeler, qurylys materıaldary sııaqty baǵyttar boıynsha arnaıy tehnıkalyq komıtetter qurý eskerilgen. Bul komıtetterge kásibı mamandar, ǵylymı uıymdar, bıznes ókilderi men memlekettik organdar qatysady.
Jańa Qurylys kodeksi aıasynda baqylaý men qadaǵalaýdy kúsheıtýge baǵyttalǵan jańa tásilder ázirlendi. Qurylys sapasyn qatań qadaǵalaý úshin baqylaý organdarynyń qatysýymen qurylys barysy «josparly ınspektsııalaý» arqyly basynan bastap, paıdalanýǵa berilgenge deıin tekseriledi.
Mınıstrdiń aıtýynsha, endi profılaktıkalyq baqylaý qashyqtan, ıaǵnı obektige barmaı-aq júrgiziletin bolady. Bul úshin memlekettik organdardyń derekteri men aqparattyq júıeler paıdalanylady, qajet bolǵan jaǵdaıda dereý shara qabyldanady. Sonymen qatar, ákimdikterdiń jumysyna da baqylaý artyp, zań buzýdy aldyn alý sharalary kúsheıtiledi.
- Qurylys kodeksi jobasynda nysandy qabyldaý kezinde memlekettik sáýlet-qurylys baqylaý men tótenshe jaǵdaı organdarynyń mindetti túrde qatysýy qarastyrylǵan. Olar nysannyń paıdalanýǵa daıyn ekendigi týraly qorytyndy beredi. Jańa zańnamalyq ózgerister qurylys tsıkliniń basynan aıaǵyna deıin memlekettik baqylaýdy kúsheıtýdi kózdep otyr, - dedi mınıstr.
Kodekste Memlekettik aqparattyq madelder banki fýnktsıonalyn keńeıtý negizinde Biryńǵaı qurylys portalyn qurý kózdelgen, ıaǵnı qurylys salasyndaǵy barlyq qyzmetter «bir tereze» qaǵıdaty boıynsha kórsetiletin bolady.
Budan buryn habarlanǵandaı, depýtat Baqytjan Bazarbek jańa Qurylys kodeksiniń jobasynda adam qaýipsizdigi birinshi orynda bolatynyn aıtqan edi.