Májilis zańnama aktilerin Konstıtýtsııa normalaryna sáıkes keltirýge qatysty qujatty qabyldady
ASTANA. KAZINFORM — Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine olardy QR Konstıtýtsııasynyń normalaryna sáıkes keltirý máseleleri boıynsha ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.
Atalǵan zań keıbir zańnamalyq aktilerdi Qazaqstan Respýblıkasy Konstıtýtsııasynyń normalaryna sáıkes keltirý maqsatynda ázirlendi.
- Konstıtýtsııalyq Sottyń normatıvtik qaýlysyna sáıkes «Sybaılas jemqorlyqqa qarsy is-qımyl týraly» Qazaqstan Respýblıkasy Zańynyń 13-baby Konstıtýtsııaǵa sáıkes kelmeıdi dep tanyldy. Konstıtýtsııalyq Sot memlekettik qyzmetshilerge teńestirilgen adamdarǵa qatysty qoldanylatyn sybaılas jemqorlyqqa qarsy shekteýler olardyń kásipkerlikpen aınalysý erkindigine quqyqtaryn buzatynyn anyqtady. Osyǵan baılanysty zań jobasynda sybaılas jemqorlyqqa qarsy shekteýler máselelerin retteıtin zańnamaǵa birqatar túzetý engizildi. Atap aıtqanda, memlekettik fýnktsııalardy oryndaýmen syıyspaıtyn qyzmetpen aınalysýǵa tyıym salýǵa baılanysty sybaılas jemqorlyqqa qarsy shekteýler qoldanylatyn laýazymdy adamdardyń toby naqtylanady. Bul shekteýler respýblıkalyq memlekettik kásiporyndarda, kommýnaldyq kásiporyndarda, kommýnaldyq memlekettik mekemelerde basqarý fýnktsııalaryn júzege asyratyn, memlekettik qyzmetshilerge teńestirilgen adamdarǵa qoldanylmaıdy, -dedi Májilis depýtaty Qaırat Balabıev.
Sonymen qatar, memlekettik laýazymdy atqaratyn adamdardyń jáne olarǵa teńestirilgen adamdardyń kommertsııalyq uıymdardyń múlkin senimgerlik basqarý sharty boıynsha uıymdardyń daýys beretin aktsııalarynyń jalpy sanynyń 5 paıyzynan aspaıtyn kólemde senimgerlik basqarýǵa berýdegi mindettemesi alynyp tastalady.
- Kelisimshart boıynsha áskerı qyzmet ótkeretin áskerı qyzmetshilerge de osyndaı quqyq beriledi. Sonymen birge, zań jobasynda Úkimet músheleri úshin óz menshigindegi turǵyn úıdi jalǵa berý boıynsha shekteýlerdi boldyrmaıtyn normalar kózdelgen. Budan basqa, birqatar zańnamalyq aktini Qazaqstan Respýblıkasy Konstıtýtsııasynyń normalaryna sáıkes keltirýdi kózdeıtin Konstıtýtsııalyq Sottyń sheshimderin iske asyrýǵa baǵyttalǵan ózge de túzetýler engizilgen, - dedi depýtat.
Budan buryn habarlanǵandaı, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine qaýipsiz eńbek jaǵdaılaryn jetildirý jáne jumyskerlerdiń eńbek quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.