Májilis zań qabyldady: Qazaqstan men Qyrǵyzstan odaqtastyqty tereńdetedi
ASTANA. KAZINFORM – Búgin Parlament Májilisiniń jalpy otyrysynda «Qazaqstan Respýblıkasy men Qyrǵyz Respýblıkasy arasyndaǵy odaqtastyq qatynastardy tereńdetý jáne keńeıtý týraly shartty ratıfıkatsııalaý týraly» zańy qabyldandy.
Bul shartqa 2024 jylǵy 19 sáýirde Astanada qol qoıyldy.
Sharttyń maqsaty - qazaq-qyrǵyz yntymaqtastyǵynyń keshendi damýyna qosymsha serpin berý. Qujatta saıası, áskerı, saýda-ekonomıkalyq, ınvestıtsııalyq, aýyl sharýashylyǵy, kólik-tranzıt, sý-energetıka, bilim berý, ǵylymı-tehnıkalyq jáne mádenı-gýmanıtarlyq salalardaǵy ózara tıimdi yntymaqtastyqty keńeıtý jáne ekijaqty ózara is-qımyldy keshendi damytý eskerilgen.
- Osy qujat ary qaraı barlyq baǵytta jumys isteýge, odaqtastyqty jan-jaqty tereńdetýge arnalǵan. Qujat Qazaqstan men Qyrǵyzstan arasyndaǵy Joǵary memleketaralyq keńes aıasyndaǵy, sondaı-aq parlamentaralyq baılanystardy nyǵaıtýǵa járdemdesedi. Geosaıası turaqsyzdyq jaǵdaıynda osy shartty ratıfıkatsııalaý - saıası dıalogty, qaýipsizdikti qamtamasyz etý salasyndaǵy ózara is-qımyldy damytý jáne eki memlekettiń ornyqty damýy úshin berik negiz bolady. Qyrǵyz jaǵy ratıfıkatsııa rásimderin aıaqtaǵany týraly 2024 jyldyń 17 jeltoqsanynda habarlady. Bul shart halyqtarymyzdyń túbegeıli múddelerine saı keledi dep baıandaımyz, - dedi Syrtqy ister mınıstriniń birinshi orynbasary Aqan Rahmetýllın.
Májilistiń Halyqaralyq ister, qorǵanys jáne qaýipsizdik komıtetiniń málimetine qaraǵanda, taraptar terrorızmdi, ekstremızmdi jáne separatızmdi, sondaı-aq transulttyq uıymdasqan qylmysty, kıberqylmysty, zańsyz kóshi-qondy, adam saýdasyn, qarý-jaraqtyń, esirtkiniń, psıhotroptyq zattar men olardyń prekýrsorlarynyń zańsyz aınalymyn qosa alǵanda, qaýipsizdiktiń qazirgi zamanǵy syn-tegeýrinder men qaterlerge qarsy is-qımyldaǵy yntymaqtastyqty keńeıtedi jáne tereńdetedi.
Eske salsaq, byltyr Qyrǵyzstanda Qazaqstanmen odaqtastyq týraly shart ratıfıkatsııalanǵanyn jazǵan edik.
Jaqynda Qazaqstan men Qyrǵyzstan aqyndary Eýropa tórinde aıtysqanyn jazǵan edik. Dostastyq kezdesý 2015 jyly ıÝNESKO-nyń materıaldyq emes qundylyqtarynyń tizimine engen, eki elge ortaq teńdessiz ónerdiń 10 jyldyǵyna oraıy uıymdastyryldy.