Májilis veıpterge tyıym salatyn zańdy qabyldady
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly» Zańy qabyldandy.
Qujat medıtsına qyzmetkerleriniń kásiptik jaýapkershiligin mindetti saqtandyrý júıesin engizýge, «Qazaqstannyń eńbek sińirgen dárigeri» ataǵyn berýge, tıisti aqshalaı syıaqy tólenip, jyl saıynǵy «Óz mamandyǵynyń úzdigi» konkýrsyn ótkizýge, medıtsına qyzmetkerleriniń quqyqtyq qorǵalýyn kúsheıtýge baǵyttalǵan.
«Depýtattar zań jobasynyń jekelegen normalaryn naqtylaıtyn jáne onyń mazmunyn jaqsartatyn túzetýler engizdi. Birinshiden, medıtsına qyzmetkerleriniń kásiptik jaýapkershiligin mindetti saqtandyrý tetigin jetildirildi. Atap aıtqanda, saqtandyrý uıymdaryna saqtandyrý jarnalaryn tóleýdi medıtsınalyq qyzmetter kórsetýge arnalǵan tarıfterdi ulǵaıtý esebinen densaýlyq saqtaý sýbektileri ǵana júzege asyratyn bolady. Budan bólek, medıtsınalyq qyzmet kórsetý máseleleri boıynsha patsıentterdiń ótinishterin qaraý tártibi anyqtaldy. Bul rette, táýelsiz saraptama júrgizý jónindegi normalar kózdelgen, onyń qorytyndysy saqtandyrý jaǵdaıynyń bastalý faktisin rastaý úshin ǵana qoldanylady. Saqtandyrý jaǵdaıynyń bastalý faktisi rastalǵan kezdegi saqtandyrý tólemderiniń mólsheri naqtylandy, olardyń mólsheri patsıenttiń ómiri men densaýlyǵyna zııan keltirý dárejesine baılanysty bolady», - dedi depýtat Gúldara Nurymova.
Ekinshiden, medıtsına qyzmetkerleriniń áleýmettik kepildikterin kúsheıtý maqsatynda mektepke deıingi balalar uıymdarynda oryn bólý kezinde dárigerlerdiń balalaryna basym quqyq berý qarastyrylǵan. Sonymen qatar, qyzmettik mindetterin atqarý nátıjesinde qaza tapqan nemese múgedektigi belgilengen medıtsına qyzmetkerleriniń balalaryna memlekettik bilim berý grantyn bere otyryp, joǵary oqý oryndaryna konkýrstan tys qabyldaý eskerilgen.
«Budan basqa, medıtsına kadrlaryn yntalandyrý jáne olardyń tapshylyǵyn qysqartý úshin aýylǵa jumys isteý úshin keletin medıtsına qyzmetkerlerine 100 eń tómengi jalaqy mólsherinde birjolǵy aqshalaı tólemdi júzege asyrý jónindegi normalar qabyldandy. Memleket basshysynyń bergen tapsyrmasy aıasynda birjolǵy 500 AEK kóleminde tólenetin «Óz mamandyǵynyń úzdigi» ataǵyn berý kózdelgen. Sondaı-aq medıtsına salasyndaǵy erekshe eńbegi úshin 1000 AEK somasynda birjolǵy tólemmen «Qazaqstannyń eńbek sińirgen dárigeri» ataǵyn berilmek», - dedi depýtat.
Munymen qosa, zańda veıpterdi ákelýge, óndirýge, satýǵa jáne taratýǵa tolyq tyıym salýdy belgileý, áskerı medıtsına qyzmetkerleriniń qyzmetin jetildirý jónindegi normalar qarastyryldy.
