Májilis veterınarııa mamandaryn áleýmettik qoldaýǵa 22 mlrd teńge bólmek
ASTANA. KAZINFORM – Veterınarııa salasyndaǵy mamandardyń mártebesin kóterip, olardyń zańdy múddelerin qorǵaý úshin elimizde Veterınarııalyq palata qurylady. Bul týraly Májilis depýtaty Nurjan Áshimbetov málimdedi.
Depýtat Nurjan Áshimbetov halyqaralyq tájirıbeni negizge ala otyryp, salanyń mártebesin nyǵaıtatyn jańa ınstıtýt týraly aıtty.
– Dúnıejúzilik janýarlar densaýlyǵy uıymynyń usynymdaryn eskere otyryp, veterınarııa salasyndaǵy memlekettik organ retinde Veterınarııalyq palata nysanynda statýarlyq organ qurý kózdeledi, - dedi ol.
Áleýmettik jeńildikke keler bolsaq, veterınarlarǵa jyl saıynǵy demalys kezinde eki aılyqaqy mólsherinde saýyqtyrý járdemaqysy beriledi.
– Respýblıkalyq bıýdjettik komıssııa mamandarǵa áleýmettik qoldaý kórsetýge – 22 mlrd teńge, arnaıy kıimmen qamtamasyz etýge – 1,8 mlrd teńge bólýdi josparlap otyr, - dep túıindedi depýtat.
Aıta keteıik, buǵan deıin ıtter men mysyqtardy mindetti chıpteý engiziletinin jazǵan edik.
