Májilis úsh jyldyq bıýdjetke Senat engizgen túzetýlermen kelisti
ASTANA. KAZINFORM – Parlament Májilisi «2025-2027 jyldarǵa arnalǵan respýblıkalyq bıýdjet týraly» Zańǵa Senat engizgen túzetýlermen kelisti.
Búgin Májilistiń jalpy otyrysynda depýtat Erkin Ábil bıylǵy 21 qarashada atalǵan zań Qazaqstan Respýblıkasy Parlamenti Senatynyń jalpy otyrysynda qaralǵanyn eske saldy.
«Senat «2025-2027 jyldarǵa arnalǵan respýblıkalyq bıýdjet týraly» Zańyna jalpy somasy 118,8 mlrd teńgege 135 túzetý engizdi . Onyń ishinde 2025 jyly – 60 mlrd teńge, 2026 jyly – 38,5 mlrd teńge, sondaı-aq 2027 jyly 20,3 mlrd teńge qamtyldy. Bul shyǵystar óńirlerdi qoldaýǵa, atap aıtqanda «Aýyl el besigi» baǵdarlamasyn iske asyrýǵa, kólik ınfraqurylymyn damytýǵa, sýmen jabdyqtaýǵa jáne sý burýǵa, gaz tasymaldaý júıesin damytýǵa jáne basqa da baǵyttarǵa jiberildi. Jalpy, Senat engizgen túzetýler respýblıkalyq bıýdjet jobasy parametrleriniń tepe-teńdigin buzbaıdy jáne ekonomıka men óńirlerdi odan ári turaqty damytýǵa baǵyttalǵan. Baıandalǵandy eskere otyryp, Májilistiń Qarjy jáne bıýdjet komıteti Parlamentiniń Májilisine Senat engizgen ózgerister men tolyqtyrýlarmen kelisýdi usynýǵa bolady dep esepteıdi», - dedi E. Ábil.
Jalpy otyrys kezinde palata depýtattary bul usynysqa qoldaý bildirdi.
Budan buryn habarlanǵandaı, 21 qarashada Senat respýblıkalyq bıýdjet týraly zańdy Májiliske qaıtardy.