Májilis ulttyq qaýipsizdik organdary rezerviniń maqsatyn naqtylaıtyn zańdy qabyldady
ASTANA. KAZINFORM — Májilis «Qazaqstan Respýblıkasynyń keıbir zańnamalyq aktilerine Qazaqstan Respýblıkasy arnaýly memlekettik organdarynyń qyzmeti máseleleri boıynsha ózgerister men tolyqtyrýlar engizý týraly» Zańdy jáne oǵan ilespe qujatty ekinshi oqylymda qabyldady.
Depýtat Oljas Quspekovtyń aıtýynsha, qaralyp otyrǵan zań jobalaryn Májilis 1 sáýirde birinshi oqylymda maquldady. Zań jobasynyń maqsaty — Qazaqstan Respýblıkasynyń arnaýly memlekettik organdarynda qyzmet ótkerý salasyndaǵy zańnamany odan ári jetildirý.
— Zań jobasymen jumys barysynda depýtattar birqatar túzetýler engizdi, olardyń qatarynda memlekettik qupııalarǵa tek rejımdik obektilerge ǵana emes, sondaı-aq Qazaqstan Respýblıkasynyń erekshe rejımdegi jáne erekshe qorǵalatyn obektilerin salýǵa, jóndeýge jáne kútip-ustaýǵa bólingen qarajatty nemese naqty shyǵyndardy ashyp kórsetetin málimetterdi jatqyzý usynylady. Budan basqa, Qazaqstan Respýblıkasynyń Ákimshilik quqyq buzýshylyq týraly kodeksiniń 453-babymen sáıkestendirý maqsatynda Qazaqstan Respýblıkasynyń Azamattyq protsestik kodeksine jáne Qazaqstan Respýblıkasynyń «Terrorızmge qarsy is-qımyl týraly» jáne «Ekstremızmge qarsy is-qımyl týraly» zańdaryna ekstremıstik jáne terrorıstik materıaldardy tasymaldaýǵa tyıym salýdy belgileıtin túzetýler engizildi. Sonymen qatar, Qazaqstan Respýblıkasynyń terrorızmge qarsy is-qımyldy júzege asyratyn jáne ekstremızmniń aldyn alýdy qamtamasyz etetin memlekettik organdarynyń quzyreti olardyń salalyq zańdaryna jáne jańadan qabyldanǵan Qazaqstan Respýblıkasynyń zańnamalyq aktilerine sáıkes naqtylandy, — dedi depýtat.
Sondaı-aq, onyń aıtýynsha, arnaýly memlekettik organdarda qyzmet ótkerý bóliginde quqyqtyq olqylyqtardy joıýǵa jáne zańnamany jetildirýge baǵyttalǵan normalar ázirlendi.
Atap aıtqanda:
Qazaqstan Respýblıkasy ulttyq qaýipsizdik organdary rezerviniń maqsaty naqtylandy, ıaǵnı ony qoldaný sharttary aıqyndaldy;
obektıvti sheshim qabyldaý maqsatynda qyzmettik tergep-tekserý materıaldarymen tanysý bóliginde ýákiletti basshynyń quqyqtary reglamentteldi;
áskerı jáne arnaýly oqý oryndaryna túsý kezinde burynǵy ataǵyn saqtaıtyn adamdar sanaty keńeıtildi;
basshylardyń ákimshilik aktileri naqtylandy;
áleýmettik sıpattaǵy birqatar túzetý qaraldy;
qaıtalanatyn normalar alynyp tastaldy.
— Іlespe zań jobasynda ekstremıstik jáne terrorıstik materıaldardy daıyndaǵany, saqtaǵany, ákelgeni, tasymaldaǵany jáne taratqany úshin burynnan belgilengen jaýaptylyqtan bólek, olardy basyp shyǵarǵany úshin ákimshilik jaýaptylyqty kózdeıtin túzetý usynyldy. Atalǵan norma quqyqtyń materıaldyq normalary burynnan kózdelgen Qazaqstan Respýblıkasynyń «Terrorızmge qarsy is-qımyl týraly» jáne «Ekstremızmge qarsy is-qımyl týraly» zańdarymen sáıkestendirýge, sondaı-aq Qazaqstan Respýblıkasynyń Azamattyq protsestik kodeksimen úılestirýge baǵyttalǵan. Sonymen qatar, salyq zańnamasynda belgilengen jaǵdaılarda buryn ákimshilik jaýaptylyqqa tartylǵan adamdardy ákimshilik jazany oryndaýdan bosatýdy kózdeıtin túzetý usynyldy, — dedi Oljas Quspekov.
Osydan keıin Májilis depýtattary atalǵan Zańdardy qabyldap, Senat qaraýyna jiberý týraly sheshim qabyldady.
