Májilis úleskerlik qurylysty retteıtin zań jobasyn maquldady
ASTANA. KAZINFORM – Májilis depýtattary úleskerlik qurylysty retteıtin zań jobasyn birinshi oqylymda maquldady.
Zań jobasyn tanystyrǵan depýtat Samat Musabaevtyń aıtýynsha, zańnamaǵa usynylyp otyrǵan jańashyldyqtar úleskerlik qurylysqa tártip ornatýǵa arnalǵan.
- Zań jobasy turǵyn úı qurylysyna úlestik qatysýdyń tartymdylyǵyn arttyrýǵa múmkindik beretin sharalardy yntalandyrýǵa baǵyttalǵan. Jumys toby barysynda depýtattar turǵyn úı qurylysyna úlestik qatysý týraly Zańnyń qoldaný aıasyn keńeıtý úshin birqatar túzetýge bastamashylyq jasady, - dedi ol.
Atap aıtsaq, úleskerlerdiń quqyǵyn qorǵaý úshin aldyn ala shart jasaýǵa, ınvestıtsııa men brondaýǵa, aldyn ala kelisimsharttar jasasýǵa tyıym salý tetikteri naqtylanbaq.
Salynyp jatqan úıdi ákimdiktiń ruqsatynsyz nemese Birińǵaı operatordyń kepildigi bolmaǵan jaǵdaıda jarnamalaýǵa, ekinshi deńgeıli bankterden ıpoteka rásimdeýge tyıym salynady.
Al úleskerlerdiń aqshasyn zańsyz tartqany jáne jarnama taratqany úshin 2000 aılyqtyq eseptik kórsetkishke deıin (7,9 mln.tg. deıin) aıyppul salý kózdelgen.
Osyǵan deıin Úkimet basshysynyń uurylys talaptarynyń buzylýyna qatysty shaǵymdar kóbeıip bara jatqanyn aıtqany týraly jazǵan edik.