Májilis UQShU qyzmetine qatysty zańdy qabyldady
ASTANA. KAZINFORM – Májilistiń jalpy otyrysynda «2010 jylǵy 10 jeltoqsandaǵy Ujymdyq qaýipsizdik týraly shart uıymy ujymdyq qaýipsizdik júıesiniń kúshteri men quraldary quralymdarynyń mártebesi týraly kelisimge ózgerister engizý týraly hattamany ratıfıkatsııalaý týraly» zań jáne oǵan ilespe qujat qabyldandandy.
– Hattamalarǵa 2024 jyly 28 qarashada qol qoıyldy. Olarda kózdelgen ózgerister kelisimderdiń jekelegen erejelerin atalǵan qurylymdardyń uıymǵa múshe memleketterdiń aýmaqtarynda ýaqytsha bolýyn qamtamasyz etý jáne olardy tasymaldaý bóliginde naqtylaýǵa baǵyttalǵan. Birinshi, kelisimniń túsindirme apparattary naqtylandy jáne tranzıttik ushý, áýe aılaqtyq tehnıkalyq qamtamasyz etý, aeronavıgatsııalyq qyzmet kórsetý, aeronavıgatsııalyq derekter t.b. termındermen tolyqtyryldy, – dedi QR Qorǵanys mınıstriniń tárbıe jáne ıdeologııalyq jumystar jónindegi orynbasary Asqar Mustabekov.
Sondaı-aq, qurylymdardy qabyldaýshy taraptyń aýmaǵyna jiberýi múmkin jaǵdaılar egjeı-tegjeıli naqty bekitildi.
Odan bólek, shuǵyl den qoıý qajet bolǵan jaǵdaıda Ujymdyq qaýipsizdik keńesi áskerı tasymaldaýǵa ótinimderdi qarastyryp, sheshim qabyldaıtyn merzim úsh táýlikten bir táýlikke qysqartyldy.
– Tórtinshi, qurylymdardyń maqsaty boıynsha mindetterin sheshý úshin tasymaldaý kezinde, ıaǵnı Ujymdyq qaýipsizdik keńesiniń sheshimi boıynsha barlyq áýe aılaqtarda áýe kemelerin qabyldaý-jóneltý, áýe aılaqtyq tehnıkalyq qamtamasyz etý, turaq ornyn berý, kúzetýdi qabyldaýshy nemese tranzıttik taraptar óteýsiz júzege asyrady. Sondaı-aq, taraptardyń memlekettik avıatsııalyq áýe kemeleriniń ushýyna aeronavıagatsııalyq qyzmet kórsetý aqy alynbaı júzege asyrylady. Sonymen birge, áýe kemelerine janar jaǵarmaı materıaldaryn, arnaýly suıyqtyqtar jáne gaz quıýdy tranzıttik tarap jáne qabyldaýshy taraptyń kúshteri jáne quraldary tıisti kelisimder jáne ýaǵdalasqan negizde júrgiziletin bolady, – dedi Asqar Mustabekov.
Onyń sózinshe, hattamalardy ratıfıkatsııalaý Qazaqstan múddesine jáne uıym sheńberindegi halyqaralyq mindetterge sáıkes keledi.
Aıta keteıik, buǵan deıin Qazaqstan UQShU aıasynda tsıfrlyq bastamalaryn tanystyrǵanyn jazǵanbyz.
