Májilis Túrkistan qalasynyń erekshe mártibesi týraly zańdy qabyldady

ASTANA. KAZINFORM – Búgin Parlament Májilisiniń jalpy otyrysynda «Túrkistan qalasynyń erekshe mártebesi týraly» Zańy men ilispe qujat ekinshi oqylymda qaralyp, qabyldandy.

Atalǵan qujattar 2022 jylǵy 27 qyrkúıekte Memleket basshysynyń Túrkistan oblysyna jumys sapary barysynda berilgen tapsyrmany iske asyrý maqsatynda ázirlendi.

- Ekinshi oqylymǵa daıyndyq barysynda jumys toby barlyq túsken usynystar men tolyqtyrýlardy, birinshi oqylymda qaralǵan máselelerdi jan-jaqty talqylady. Negizgi zań jobasy 3 taraý men 13 baptan turady. Іlespe zań jobasynda sáýlet, qala qurylysy qyzmetin normatıvtik retteýge jáne tarıhı-mádenı mura eskertkishterin qorǵaýǵa baǵyttalǵan ózgerister men tolyqtyrýlar engizý kózdelgen, - dedi Májilis depýtaty Temir Qyryqbaev.

Atalǵan zańdar aıasynda:
- Túrkistan qalasyna erekshe mártebe berýdiń negizgi maqsattary, mindetteri men qaǵıdattary aıqyndalady;
- Túrkistan qalasynyń aýmaǵynda tarıh jáne mádenıet eskertkishterin qorǵaý qamtamasyz etiledi;
- ortalyq memlekettik organdardyń, sondaı-aq Túrkistan qalasynyń jergilikti ókildi jáne atqarýshy organdarynyń ókilettikteri qaıtadan qarastyrylyp, jańa quzyret beriledi.

- Nátıjesinde, rýhanı, tarıhı-mádenı muramyzdy saqtaý, qolónershilerdi qoldaý, týrızmdi damytý, qalada kedergisiz ortany qalyptastyrý jáne basqa da ıgi ister boıynsha jumys qolǵa alynady, - dedi depýtat.

Budan buryn habarlanǵandaı, Túrkistan oblysy ákiminiń orynbasary Beısenbaı Tájibaev Túrkistan qalasyna zańmen erekshe mártebe berilse, shahar aýmaǵynda jer úı salýdyń talaptary qalaı ózgeretinin aıtty.