Májilis Túrkistan qalasyna erekshe mártebe beretin zań jobasyn maquldady

ASTANA. KAZINFORM – Májilistiń jalpy otyrysynda Túrkistan qalasyna erekshe mártebe berý týraly zań jobasy maquldandy.

Premer-mınıstrdiń orynbasary – Ulttyq Ekonomıka mınıstri Nurlan Baıbazarov zań jobasyn ázirlegen kezde Anglııa, Italııa, Ózbekstan, Ázerbaıjan sııaqty elderdiń tájirıbesi negizge alynǵanyn aıtty.

Zań jobasy arqyly Túrkistan qalasynyń ákimdigi men máslıhatyna qosymsha 34 quzyretti berý kózdelgen.

Onyń ishinde qala máslıhatyna qalanyń dızaın kodyn belgilep, qala qurylysyn josparlaý qaǵıdalaryn bekitý quzyreti berilmek. Qalada jumys isteıtin ulttyq qolóner sheberleriniń shyǵynyn ishinara bıýdjetten óteý qaǵıdalaryn belgileý de jergilikti máslıhatqa júktelmek.

Al qala ákimdigine kesene aınalasyndaǵy qurylys standarttaryn belgileý quzyreti berilmek.

Nurlan Baıbazarov osy zańdy iske asyrý úshin ózge zańdardy osy normatıvtik qujattyń talaptarymen sáıkestendirý qajettigin aıtty. Іlespe zań Jer kodeksine, «QR sáýlet, qala qurylysy jáne qurylys qyzmeti týraly», «Tarıhı-mádenı mura obektilerin qorǵaý jáne paıdalaný týraly», «QR týrıstik qyzmet týraly» zańdarǵa ózgertýler men tolyqtyrýlar engizýge arnalady.

Osyǵan deıin Qoja Ahmet ıAsaýı kesenesinen 100 metr radıýsta bıik ǵımarat salýǵa zańmen tyıym salynatyny týraly habarladyq.