Májilis Túrki memleketteri uıymyna qatysty qujatty talqylaıdy
ASTANA. KAZINFORM — Parlament Májilisiniń qaraýyna «Túrkitildes memleketterdiń yntymaqtastyq keńesin qurý týraly Nahchyvan kelisimine ózgerister engizý týraly hattamany ratıfıkatsııalaý týraly» zań jobasy kelip tústi.
- Atalǵan hattamaǵa Ázerbaıjan, Qazaqstan, Qyrǵyzstan, Túrkııa jáne Ózbekstan memleketteriniń basshylary 2022 jylǵy 11 qarashada Samarqanda ótken sammıtte qol qoıdy. Hattama 2009 jyly jasalǵan «Túrkitildes memleketterdiń yntymaqtastyq keńesin qurý týraly Nahchyvan kelisimine» ózgerister engizedi. Ol Túrkitildes memleketterdiń yntymaqtastyq keńesin Túrki memleketteri uıymyna aınaldyrýdy bekitedi. Májilistiń Halyqaralyq ister, qorǵanys jáne qaýipsizdik komıteti osy zań jobasy boıynsha qorytyndy ázirleýge daıyn, - dedi depýtat Aıgúl Quspan Májilistiń jalpy otyrysynda.
Eske sala keteıik, 2010 jyly qyrkúıekte Parlament Májilisi «Túrkitildes memleketterdiń yntymaqtastyq keńesin qurý týraly Nahchyvan kelisimin ratıfıkatsııalaý týraly» zań jobasyn maquldady.
Buǵan deıin habarlanǵandaı, 10-11 qarashada Samarqanda Túrki memleketteri uıymynyń sammıti ótti.
Jıynǵa Ázerbaıjan, Qazaqstan, Qyrǵyzstan, Túrkııa jáne Ózbekstan basshylary qatysty. Majarstan men Túrikmenstan ókilderi sammıtke baqylaýshy retinde keldi.
Túrki keńesi 2009 jyly qurylǵan. Bastapqyda onyń quramyna Ázerbaıjan, Qazaqstan, Qyrǵyzstan jáne Túrkııa kirdi. Ózbekstan odaqqa 2019 jyly qosyldy. 2021 jyldyń qarashasynda keńes Túrki memleketteriniń uıymy bolyp ózgerdi.
2022 jyly Ózbekstandaǵy sammıt barysynda birneshe qujatqa qol qoıyldy.