Májilis Tsıfrlyq kodeks jobasyn maquldady
ASTANA. KAZINFORM — Májilis Tsıfrlyq kodeks jobasy men eki birdeı ilespe zań jobasyn birinshi oqylymda maquldady
Qujattardy Ekonomıkalyq reforma jáne óńirlik damý komıtetiniń hatshysy Ekaterına Smyshlıaeva tanystyrdy.
Jańa Tsıfrlyq kodeks tsıfrlyq ortaǵa quqyqtyq mártebe berip, derekter men platformalardy aınalymǵa engizýge arnalǵan. Osylaısha tsıfrlyq derekter, júıeler, resýrstar men ınfraqurylym quqyq obektisi bolyp tanylady.
— Tsıfrlyq derekter aınalymynyń quqyqtyq rejımi engiziledi. Jazbalar túrindegi tsıfrlyq derekter alǵash ret quqyq obektisi retinde tanylǵaly otyr. Bul degenimiz, derekter ekonomıkalyq qundylyqqa ıe bolyp, azamattyq negizdegi aınalymǵa qatysa alady, — dedi depýtat.
Kodeks jobasy osy kúıinde qabyldansa, Qazaqstanda eGov sııaqty memlekettik tsıfrlyq júıe men halyqqa elektrondy negizde qyzmet kórsetetin platformalarǵa «ulttyq obekt» mártebesin berilýi múmkin. Bul atalǵan tsıfrlyq aktıvterdiń jeke menshikke, basqa elge satylyp ketýinen, ıeligine ótip ketýden qorǵaıdy.
Bul atalǵan tsıfrlyq aktıvterdiń jeke menshikke, basqa elge satylyp ketýinen, ıeligine ótip ketýden qorǵaıdy
Qazirgi nusqasynda Tsıfrlyq kodeks elektrondy tsıfrlyq qoltańbanyń quqyqtyq mártebesin elektrondy formatta qol qoıýdyń jalǵyz tásili dep bekitedi.
Al keıbir platformada onlaın qyzmetti paıdalanýǵa kelisim berý úshin tsıfrlyq rastaý tetigin qoldanýǵa bolady.
Sondaı-aq, kodeks jobasynda qoldanystaǵy elektrondy qujattardy zań tilinde úsh topqa bólý kózdelip otyr. Birinshisi — elektrondy qujattar. Oǵan tek ETsQ qoıylǵan qujattar jatady jáne qaǵaz nusqamen teńestiriledi. Ekinshisi — tsıfrlyq qujattar. Bul memlekettik bazalardan avtomatty túrde júkteýge bolatyn, kórsetilgen sátinde túpnusqa bolyp sanalatyn túrli anyqtamalardyń quqyqtyq ataýy deýge bolady. Úshinshisi — tsıfrlyq málimetter. JSN arqyly ІІM bazasynan alynǵan azamat týraly derek, ne bolmasa jyljymaıtyn múlik reestrindegi jazbalar osy tsıfrlyq málimetterge jatqyzylmaq. Basqasha aıtsaq, resmı derekkózderden alynǵan zańdy máni bar aqparattar osy sanatqa jatqyzylady.
Ekaterına Smyshlıaeva bul ózgerister azamattar men uıymdardyń tsıfrlyq ortada qoltańba qoıý, derek usyný jáne qujat almasý tártibin jeńildetip, quqyqtar men mindetterdi naqtylaı túsetinin aıtady.
Tsıfrlyq kodeks jobasy tsıfrlyq dálelderdiń sot otyrystarynda qoldanýyn jeńildetýge de baǵyttalyp otyr.
— «Tsıfrlyq dálelder» uǵymy alǵash ret engizilip otyr. Bul olardy azamattyq quqyqtyq qatynastar men sot protsesterinde paıdalaný múmkindigin ashady. Bul sandyq jazbalardy, jýrnaldar men tranzaktsııalardy zańdyq mańyz bar kózder retinde tanýǵa múmkindik beredi, — dedi qujatty tanystyrǵan Ekaterına Smyshlıaeva.
Sondaı-aq, zańnamaǵa «tsıfrlyq deldal» uǵymy da engizilýi múmkin. Bul uǵymdardy zańnamaǵa engizý arqyly Yandex Go, Glovo, Chocofood sııaqty eńbek platformalarynyń, Kaspi, Wildberries, OZON sııaqty marketpleısterdiń, booking, krisha.kz qyzmet agregatorlarynyń, memlekettik tsıfrlyq servısterdiń jaýapkershiligi men jumys tártibin naqty belgileýge jol ashady.
Aıta ketý kerek, Qazaqstanda tsıfrlyq kodeks qabyldaý máselesi 2022 jyldan beri talqylanyp kelgen edi.