Májilis tóraǵasynyń orynbasary MÁMS jaıynda: Dárigerge jazylýǵa birneshe apta kerek

Mindetti áleýmettik medıtsınalyq saqtandyrý júıesi naqty nátıjesi baıqalmaı tur. Bul týraly Májilis tóraǵasynyń orynbasary Danııa Espaeva aıtty, dep habarlaıdy QazAqparat tilshisi.

«Mindetti áleýmettik medıtsınalyq saqtandyrý júıesin engizgen kezde, Úkimet bul model kórsetiletin medıtsınalyq qyzmettiń tizimin keńeıtýdi jáne ony ár azamat ózi qalaǵan jerde kez kelgen ýaqytta alýy múmkindigin qamtamasyz etetinin aıtqan edi. Osylaısha «aqsha patsıenttiń sońynan eredi» qaǵıdaty oryndalýy kerek edi. Alaıda qazir naqty nátıjesi kerisinshe ekenin baıqadyq», - dedi D. Espaeva Parlament Májilisinde ótip jatqan Úkimet saǵatynda.

Onyń aıtýynsha, depýtattardyń halyqpen kezdesýinde azamattardan medıtsınalyq qyzmetterdiń sapasyna qatysty kóptegen shaǵym túsip jatyr.

«Bul rette, adamdar emhanalarda uzyn-sonar kezek bar ekenin únemi aıtyp júr. Al naqty dáriger mamanǵa jazylý úshin birneshe apta, tipti aılap kútý kerek. Keıbir jaǵdaıda dárigerge ýaqytynda jete almaı, aqyly qyzmetke júginip, artyq shyǵynǵa tap bolady. Osynyń saldarynan turǵyndar «saqtandyrý jarnasyn ne úshin tóleımiz? Onyń qandaı artyqshylyǵy bar?» degen suraqtardy jaýdyryp jatyr. Adamdardyń kóbisi saqtandyrý júıesinde bolmaǵandyqtan, olarǵa jekelengen qyzmetter kórsetilmeıdi. Qazir shuǵyl medıtsınalyq qyzmetke júginýge májbúr 3 mln-nan astam adam saqtandyrý júıesinen tys qalǵan. Bul óz kezeginde aýrýdyń asqynýyna alyp keledi», - dedi Májilis tóraǵasynyń orynbasary.

Budan buryn habarlanǵandaı, Densaýlyq saqtaý mınıstri Ajar Ǵınııat el azamattary óz densaýlyǵyna qansha qarajat jumsaıtynyn aıtty.