Májilis tóraǵasynyń orynbasary bankterdiń negizgi kemshiligin atady
ASTANA. KAZINFORM – Jańa zań jobasynda bank qyzmetterin sapaly etetin tetikter qarastyrylǵan. Bul týraly Májilis tóraǵasynyń orynbasary Danııa Espaeva málim etti.
- Prezıdent bıylǵy 8 qyrkúıektegi Joldaýynda Zańdy osy jyldyń sońyna deıin qabyldaýdy tapsyrdy. Bul rette, básekelestikti kúsheıtý jáne naryqqa jańa qatysýshylardy tartý, sondaı-aq qarjy júıesindegi tehnologııalardy ilgeriletý jáne tsıfrlyq aktıvter aınalymyn yryqtandyrý jóninde qosymsha mindetter qoıyldy. Aıta ketý kerek, tek qana sońǵy 5 jylda Bankter týraly Zańǵa 31 zańmen ózgeris engizildi. Onyń ishinde, osy saılanym aıasynda ǵana biz birlesip 800-den astam túzetý engizdik, sol arqyly qaryz alýshylardyń quqyqtary kúsheıtilip, bankter men uıaly baılanys operatorlarynyń jaýapkershiligi artty. Olar qaryz alýshy azamattarymyzdyń quqyqtaryn qorǵaýǵa, qaryz júktemesin azaıtýǵa jáne nesıelik alaıaqtyqqa qarsy kúresti kúsheıtýge baǵyttalǵan, - dedi D. Espaeva Parlament Májisinde bank qyzmeti týraly zań jobasynyń tanystyrylymy kezinde
Osy oraıda ol qaralyp otyrǵan zań jobasynda basqa da negizgi mindetter sheshimin tabatynyn jetkizdi. Atap aıqanda, naryqqa jańa qatysýshylardy tartý úshin jaǵdaı jasalady, bul básekelestikti kúsheıtip, bank qyzmetterin sapaly etedi jáne ekonomıkanyń naqty sektoryn qarjylandyrýǵa ekinshi deńgeıdegi bankterdiń qatysýyn qamtamasyz etedi.
- Bankterdiń naqty sektorǵa nesıe bólýge qatysý deńgeıiniń tómendigin Strategııalyq josparlaý agenttiginiń derekterinen baıqaýǵa bolady. Máselen, Qazaqstanda 2024 jyly negizgi kapıtalǵa salynǵan ınvestıtsııa 19,4 trln teńgeni qurady. Qarjylandyrý kózderiniń qurylymynda ınvestorlardyń menshikti qarajaty basym, ıaǵnı 64% nemese 12,5 trln teńge. Bıýdjet qarajatynyń kólemi 4,1 trln teńgeni (21,2%), tartylǵan qarajat 2 trln teńgege (10,6%) jetti, onyń ishinde bankterden alynǵan nesıeler nebári 3,8% nemese 741 mlrd teńgeni quraıdy. 10 jyl ishinde qaryz qarajatynyń úlesi 3 esege (31,4-ten 10,6%-ǵa deıin) azaıdy. Osylaısha, ekinshi deńgeıli bankterdiń negizgi qorlarǵa nesıe bólýge qatysý deńgeıiniń tómendigi baıqalyp otyr, - dedi depýtat.
Eske salsaq, bıylǵy Joldaýda Memleket basshysy Qasym-Jomart Toqaev bankter týraly zańdy 2025 jyldyń aıaǵyna deıin qabyldaý kerek ekenin atap ótti.