Májilis tóraǵasy: Joldaý — Prezıdenttiń strategııalyq reformalarynyń jalǵasy
ASTANA. KAZINFORM — Májiliste Erlan Qoshanovtyń tóraǵalyǵymen Bıýro otyrysy ótti. Palata spıkeri Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýyn júzege asyrýdyń negizgi mindetterin atap ótti.
— Ár joldaý — alǵa degen qarqyndy umtylys. Prezıdent laýazymyna kirisken kúnnen bastap Qasym-Jomart Kemeluly aýqymdy strategııalyq reformalardy qolǵa aldy. Búgingi joldaý — sol reformalardyń zańdy jalǵasy. Osylaısha, Memleket basshysynyń ekonomıka, saıasat pen ıdeologııa salasyn qatar reformalaýǵa baǵyttalǵan strategııalyq baǵdary úzdiksiz iske asýda. Búgingi Joldaý qoǵamdy tolǵandyryp otyrǵan eń ózekti problemalarǵa naqty jaýap der edim, — dedi Májilis tóraǵasy.
Erlan Qoshanov óńirlerdi aralap kelgen depýtattar azamattardyń muń-muqtajy men talap-tilegin, eldegi jaǵdaıdy jaqsy biletinin aıtty. Ol Joldaýda shaǵyn jáne orta bıznesti qoldaý, aýyl sharýashylyǵyn qarjylandyrý, bankterdiń ekonomıkaǵa kóbirek qarjy quıýyna jaǵdaı jasaý, salyq saıasatyn qaıta qaraý jáne bıýdjet tapshylyǵy máselesin sheshý jónindegi mańyzdy sharalardyń barlyǵy zańnamalyq deńgeıde sheshimin tabýy kerek ekenin atap ótti.
— Qazir Májilistiń qaraýynda Bıýdjet kodeksi jatyr. Palataǵa jańa Salyq kodeksiniń jobasy kelip tústi. Osy kodeksterdi qaraý kezinde Prezıdent tapsyrmalarynyń barlyǵyn eskerýimiz kerek. Bul zańdar Memleket basshysynyń ekonomıkany jańǵyrtý boıynsha tapsyrmalaryn oryndaýda negizgi ról atqarady, — dedi Májilis tóraǵasy.
Májilis spıkeri sondaı-aq Prezıdent «Bankter týraly» jańa zań qabyldaý jóninde naqty tapsyrma berip, memlekettik kásiporyndardy basqarý saıasatyn jetildirý jáne aktıvterdi qaıtarý boıynsha naqty mindetter júktegenin eske saldy.
Depýtattar aldyna qoıylǵan mindetterdiń qatarynda Ulttyq qordan bólingen qarjyny tıimdi paıdalaný, halyqty tolǵandyryp otyrǵan mańyzdy áleýmettik máselelerdi sheshý, onyń ishinde bilim berý salasyn jáne buqaralyq sportty damytý máseleleri de bar.
Sondaı-aq spıker 6 qazanda ótetin atom elektr stantsııasyn salý boıynsha jalpyhalyqtyq referendýmda kúlli Qazaqstan halqynyń ustanymy belgili bolatynyn aıtty. Bul — elimizde jańa saıası mádenıet qalyptasyp kele jatqanynyń jarqyn kórinisi, «Halyq únine qulaq asatyn Úkimet» tujyrymdamasynyń naqty nátıjesi.
Sóz sońynda Erlan Qoshanov qazirgi jahandyq aýyrtpalyqtar kezeńinde Qazaqstan damýdyń jańa baǵdaryn ustanyp, ádiletti, adal jáne qaýipsiz qoǵam qurý jolynda senimdi túrde alǵa basyp kele jatqanyn atap ótti. Al zań shyǵarýshy bılik tarmaǵynyń basty mindeti — eldegi zań men tártiptiń ústemdigin qamtamasyz etý.
