Májilis tóraǵasy: Zań jobalaryn qaraý barysynda Úkimettiń qorytyndylaryn uzaq kútýge májbúrmiz

ASTANA. KAZINFORM –Parlament palatalarynyń birlesken otyrysynda Májilis tóraǵasy Erlan Qoshanov Úkimetpen ózara is-áreket kezinde jyl saıyn qaıtalanatyn problemalyq máseleni atady.

- Endi Úkimetpen ózara is-áreket kezinde jyl saıyn qaıtalap aıtýǵa týra keletin problemalyq máselelerge toqtalyp óteıin. Zańǵa sáıkes, qosymsha qarjyny talap etetin usynystar men túzetýler Úkimettiń qorytyndysyn qajet etedi. Ókinishke qaraı, biz zań jobalaryn qaraý barysynda únemi Úkimettiń qorytyndylaryn uzaq kútýge májbúrmiz. Keıde olardy 7 aıǵa deıin kútemiz. Bul jaıt Memleket basshysy bergen tapsyrmalardyń oryndalýyn, halyq kútip otyrǵan mańyzdy zańdardyń ýaqtyly qabyldanýyn kesheýildetedi, - dedi Erlan Qoshanov.

Palata spıkeri qorytyndyda depýtattardyń bastamalaryna qatysty Úkimettiń ustanymy naqty bolmaıtyn kezderi de az emestigin aıtady.

- Máselen, depýtattar erekshe qorǵalatyn tabıǵı aýmaqtar týraly zań jobasymen jumys barysynda Jer kodeksiniń bir babyna eki túrli kózqarasty qamtıtyn túzetýler daıyndady. Bergen qorytyndysynda Úkimet usynylǵan eki nusqany da qoldady. Bul – bir ǵana mysal. Sonymen qatar, keıbir memlekettik organdardyń áreketteri de júıeli jumysty qajet etedi. Máselen, Úkimet bir Palatadaǵy depýtattardyń túzetýlerin qoldamaıdy. Alaıda dál sol túzetýlerdi basqa Palatada talqylaý kezinde kenetten olarmen kelise ketedi. ıAǵnı, memlekettik organdar qorytyndy jobasyn ázirleýge atústi qaraıtyny baıqalady, - dedi ol.

Aıta keteıik, búgin Parlament palatalarynyń birlesken otyrysy ótip, onda segizinshi saılanǵan Parlamenttiń úshinshi sessııasy resmı túrde jabyldy.