Májilis tóraǵasy Vetnam Kommýnıstik partııasy Ortalyq komıtetiniń Bas hatshysymen kezdesti
ASTANA. KAZINFORM - Májilis tóraǵasy Erlan Qoshanov Qazaqstanda memlekettik saparmen júrgen Vetnam Kommýnıstik partııasy Ortalyq komıtetiniń Bas hatshysy To Lammen kezdesti, dep habarlaıdy Májilistiń baspasóz qyzmeti.
Erlan Qoshanov Vetnam Sotsıalıstik Respýblıkasynyń Kommýnıstik partııasy Ortalyq komıtetiniń Bas hatshysymen áńgimelesý barysynda Vetnam Ońtústik-Shyǵys Azııadaǵy Qazaqstannyń mańyzdy áriptesi ekenin atap ótti.
– Qazaqstan Prezıdenti Qasym-Jomart Toqaevtyń 2023 jylǵy tamyzda Vetnamǵa jasaǵan resmı sapary eki el arasyndaǵy yntymaqtastyqqa erekshe serpin berdi. Sizdiń Qazaqstanǵa jasaǵan qarymta memlekettik saparyńyz ekijaqty qarym-qatynasymyzdyń tarıhyndaǵy jańa kezeńniń bastaýyna – strategııalyq áriptestiktiń mańyzdy belesine aınalýda. Búgin Qasym-Jomart Kemeluly Toqaevpen keleli kelissóz ótkizdińizder. Úkimetaralyq mańyzdy qujattarǵa qol qoıyldy. Bul ózara yqpaldastyqtyń rýhy men mazmunyna tolyq saı keledi, – dedi Májilis tóraǵasy.
Májilis spıkeri To Lamdy Qazaqstan Prezıdentiniń qolynan alǵan joǵary marapat – І dárejeli «Dostyq» ordenimen quttyqtady.
Erlan Qoshanov Məjilistiń Vetnam Ulttyq jınalysymen yntymaqtastyqty odan əri tereńdetýge jáne keńeıtýge qyzyǵýshylyq tanytyp, Vetnam men Qazaqstan depýtattary arasynda beıindi komıtetter men dostyq toptary deńgeıinde turaqty kezdesýler ótkizýdiń, ózara sapar almasýdyń oń tájirıbesi qalyptasqanyn atap ótti.
Mártebeli meımanǵa Memleket basshysy reformalarynyń júzege asyrylý barysy men kóppartııaly Parlamenttiń zań shyǵarý jumysy jaıly málimet berildi.
Óz kezeginde Vetnam Kommýnıstik partııasynyń Bas hatshysy eki el arasyndaǵy jan-jaqty baılanystardy nyǵaıtý, sonyń ishinde parlamenttik dıplomatııa, saýda-ekonomıka jáne mádenı-gýmanıtarlyq salada, sondaı-aq partııa baǵyty boıynsha da damytý qajettigine nazar aýdardy.
Kezdesý barysynda taraptar AMANAT partııasy men Vetnam Kommýnıstik partııasy arasynda berik áriptestik baılanys ornaǵanyn atap ótip, eki saıası uıymnyń yntymaqtastyǵyn odan ári keńeıtý máselesine erekshe mán berdi. Bul rette qos partııany biriktiretin ortaq maqsattar bar. Ol – memlekettilikti nyǵaıtý, demokratııa, áleýmettik áriptestik pen kelisim qaǵıdattaryna negizdelgen erkin ári ashyq qoǵam qurý.
Taraptar eki el arasyndaǵy parlamentaralyq yntymaqtastyqty tereńdetý, zań shyǵarý baǵytynda tájirıbe almasý, sondaı-aq týrızm, kólik, saýda, aýyl sharýashylyǵy, óndiris jáne basqa da salalar boıynsha ekijaqty qatynastardy damytýǵa zańnamalyq qoldaý kórsetý jóninde kelisti.
Osyǵan deıin Májilis úlesker aqshasyna turǵyn úı salý erejesin jetildiretin zańdy qabyldaǵany týraly jazdyq.