Májilis tóraǵasy respýblıkalyq bıýdjet týraly: óńirler qarjy suraýyn toqtatar emes

ASTANA. KAZINFORM – Aldaǵy ýaqytta ákimdikterdiń qyzmeti bıýdjetti tıimdi ıgerýi men kiristi arttyrý jumysy boıynsha baǵalanady. Bul týraly Májilis tóraǵasy Erlan Qoshanov málim etti.

«Bıýdjetaralyq qatynastarda birqatar problema bar. Búginde shaǵyn jáne orta bıznesten túsetin salyq túsimderin óńirlerge berý nátıjesinde olardyń qarjylyq múmkindikteri artqan. Sońǵy jyldary barlyq derlik óńirde korporatıvtik tabys salyǵy boıynsha josparlardyń artyǵymen oryndalýy baıqalady. Sonymen qatar, aımaqtarǵa respýblıkalyq bıýdjetten beriletin nysanaly transfertter kólemi burynǵy qalpynsha, tipti keı óńirlerde ósip otyr. Al, óńirler ortalyqtan qarjy suraýyn toqtatar emes. Tipti jumsaý maqsaty da ózgermegen», - dedi Erlan Qoshanov Májilistiń jalpy otyrysynda 2025-2027 jyldarǵa arnalǵan respýblıkalyq bıýdjetti talqylaýdy qorytyndylaı otyryp. 

Sondaı-aq, Májilis spıkeri óńirlerdiń qosymsha resýrstardy qanshalyqty tıimdi ıgerip jatqany alańdatatynyn aıtty. 

«Óńirlerge túsken qosymsha kirister tek qysqa merzimdik qajettilikterdi sheshýge jumsalmaýǵa tıis. Ol halyqtyń ómir súrý sapasyn arttyrýdy qamtamasyz etetin, óńir úshin mańyzdy ınfraqurylymdyq jobalarǵa baǵyttalýy qajet. Jergilikti jerdegi máselelerdiń kópshiligi jergilikti bıýdjet esebinen sheshilýi qajet. Sondyqtan ákimdikterdiń negizgi maqsaty – aqshany ýaqytyly ıgerý ǵana emes, kiristerdi únemi ósirip otyrý bolýy kerek. Ol úshin bıznesti damytýǵa qolaıly jaǵdaı jasaǵan jón», - deıdi ol. 

Onyń aıtýynsha, aldaǵy ýaqytta ákimdikterdiń qyzmeti bıýdjetti tıimdi ıgerýi men kiristi arttyrý jumysy boıynsha baǵalanady. 

Buǵan deıin Erlan Qoshanov Ulttyq qor qarajatyn paıdalaný praktıkasyn doǵarý qajettigin basa aıtty.