Májilis tóraǵasy Polsha Senatynyń Marshalymen kezdesti
ASTANA.KAZINFORM - Májilis tóraǵasy Erlan Qoshanov Qazaqstanǵa jumys saparymen kelgen Polsha Respýblıkasy Senatynyń Marshaly Malgojata Kıdava-Blonskamen kezdesti. Taraptar parlamentaralyq yntymaqtastyqty nyǵaıtý, sondaı-aq saýda-ekonomıkalyq jáne mádenı-gýmanıtarlyq baılanystardy keńeıtý máselelerin talqylady.
Mártebeli meımandy qarsy alǵan Májilis spıkeri eki el arasyndaǵy yntymaqtastyqtyń syndarly sıpatyn atap ótti.
– Qazaqstan men Polsha – mańyzdy strategııalyq seriktes elder. Bizdiń qarym-qatynasymyz joǵary deńgeıdegi ózara túsinistikke jáne senimge negizdelgen. Memleketterimizdiń basshylary ekijaqty yntymaqtastyqtyń zor áleýetin tıimdi iske asyrýǵa barlyq kúsh-jigerin salyp jatyr. Qazaqstan-Polsha yqpaldastyǵynyń qarqyndy damýyna eki eldiń parlamentteri de óz úlesin qosyp, barlyq deńgeıde birlesip is-áreket etip jatyr, – dedi Erlan Qoshanov.
Májilis tóraǵasy polshalyq áriptesin Prezıdent Qasym-Jomart Toqaevtyń bastamasymen júzege asyrylyp jatqan saıası reformalar týraly málimet berdi. Búkilhalyqtyq referendýmda jańa Konstıtýtsııanyń qabyldanýy jańǵyrtý protsesiniń mańyzdy kezeńine aınaldy. Konstıtýtsııalyq normalardy is júzine asyrý maqsatymen Parlament asa mańyzdy zańdardy qabyldady. Olardyń qatarynda Prezıdent, Quryltaı, Halyq keńesi týraly jáne basqa da zańnamalyq aktiler bar. Májilis spıkeri áriptesin aldaǵy parlamenttik saılaýdy baıqaý jónindegi mıssııalarǵa qatysýǵa shaqyrdy.
Polsha Respýblıkasy Senatynyń Marshaly Malgojata Kıdava-Blonska qonaqjaılyq tanytqany úshin alǵysyn bildirip, Polshanyń ekijaqty yntymaqtastyqty odan ári tereńdetýge múddeli ekenin atap ótti. Ol Qazaqstannyń qol jetkizgen jetistikterine erekshe áser alǵanyn aıtty. Polsha delegatsııasynyń basshysy ekonomıka, mádenıet, bilim berý, sport jáne ózge de salalardaǵy áriptestikti keńeıtý qajettigine nazar aýdardy. Sonymen qatar Qazaqstandaǵy polıaktarǵa óz ana tilin jáne dinı senimin saqtaýǵa qolaıly jaǵdaı jasaǵany úshin rızashylyǵyn bildirdi.
Taraptar saýda-ekonomıkalyq yntymaqtastyqty damytý máselesine erekshe mán berip, óńdeý ónerkásibi, mashına jasaý, energetıka, metallýrgııa, tamaq, munaı-hımııa jáne hımııa salalaryndaǵy ózara baılanystyń joǵary áleýetin atap ótti. Sonymen qatar Májilis tóraǵasy IT salasyndaǵy yntymaqtastyqtyń ózektiligine erekshe toqtalyp, Qazaqstanda 2026 jyldyń Tsıfrlandyrý jáne jasandy ıntellekt jyly bolyp jarııalanǵanyna nazar aýdardy. Osyǵan baılanysty tsıfrlandyrý men jasandy ıntellekt salalarynda zań shyǵarý isinde tájirıbesin almasýdy kúsheıtý usynyldy.
Kezdesý qorytyndysy boıynsha taraptar bul sapar eki el arasyndaǵy parlamentaralyq dıalogqa jańa serpin beretinine senim bildirdi.
Aqordada Prezıdent Qasym-Jomart Toqaev Polsha Respýblıkasy Senatynyń Marshaly Malgojata Kıdava-Blonskamen kezdeskenin jazǵan edik.
