Májilis tóraǵasy Marokkoǵa resmı saparmen bardy
ASTANA. KAZINFORM — Marokko Koroldigi Parlamenti Ókilder palatasynyń tóraǵasy Rashıd Talbı Ál-Alamıdiń shaqyrýymen Májilis tóraǵasy Erlan Qoshanov bastaǵan bir top depýtat Marokko Koroldigine resmı saparmen bardy. Rabat qalasynda Májilis delegatsııasy Marokko Koroldigi Parlamenti Ókilder palatasynyń tóraǵasy Rashıd Talbı Ál-Alamımen jáne Keńesshiler palatasynyń tóraǵasy Muhammed Ýld Ar-Rashıdpen, sondaı-aq Úkimet basshysy Azız Ahannýshpen kezdesti.
Marokko Koroldigi Parlamenti Ókilder palatasynyń tóraǵasy Rashıd Talbı Ál-Alamımen kezdesýde taraptar eki el arasyndaǵy yntymaqtastyq máselelerin talqylady. Májilis spıkeri Qazaqstan Prezıdenti Marokkomen seriktestikti damytýǵa erekshe mán beretinin aıtyp, Korol VI Muhammedke onyń jyly lebizi men yqylasyn jetkizdi.
Qazaqstan men Marokko arasynda dıplomatııalyq qarym-qatynas ornaǵaly beri biraz salada berik baılanys qalyptasty. Sonyń biri – parlamentaralyq yqpaldastyq.
Áńgime barysynda Erlan Qoshanov osy parlamentaralyq dıalogty tereńdetýge erekshe nazar aýdardy. Marokkolyq áriptesterin zań shyǵarý salasynda tájirıbe almasyp, ásirese dostyq toptary, beıindi komıtetter jáne apparattar arasyndaǵy is-áreketti arttyrýǵa shaqyrdy.
– Biz parlamentaralyq yntymaqtastyqty nyǵaıtýǵa múddelimiz. Marokko jaǵynan da dál osyndaı yqylas bar. Halyqtyń ókilderi retinde eki eldiń tyǵyz aralasýyna, jaqyndasýyna jol ashýymyz kerek. Elderimizdiń parlamentteri arasynda qurylǵan dostyq toptary únemi baılanysta. Bıyl marokkolyq dostyq tobynyń Astanaǵa sapary jemisti ótti. Bul tájirıbeni aldaǵy ýaqytta da jalǵastyrý kerek, – dedi Májilis spıkeri.
Májilis tóraǵasy áriptesine elimizde júrgizilip jatqan reformalar jaıly aıtyp berdi. Qazaqstan Parlamentiniń qazirgi qyzmeti jóninde jan-jaqty málimet berip, aldaǵy parlamenttik reformanyń mán-jaıyn túsindirdi.
Óz kezeginde Marokko Ókilder palatasynyń tóraǵasy Qazaqstan Prezıdenti qolǵa alǵan reformalardy joǵary baǵalady.
– Biz Qasym-Jomart Toqaevtyń reformalaryn únemi baqylap otyramyz. Olar eldiń damýyna zor septigin tıgizýde. Bul bastamalar Parlament jumysyna da oń yqpal eteri sózsiz. Qazaqstan toǵyz joldyń torabynda shyǵys pen batysty baılanystyryp turǵan el. Sizdermen barlyq salada yntymaqtastyqty bekemdeı túsýge daıynbyz. Marokko Qazaqstan úshin Afrıka naryǵyna shyǵatyn qaqpa bolǵysy keledi, – dedi Rashıd Talbı Ál-Alamı.
Eki eldiń zań shyǵarýshy organdary arasyndaǵy seriktestikti damytý jaıy Marokko Keńesshiler palatasynyń tóraǵasy Muhammed Ýld Ar-Rashıdpen kezdesýde de keńinen talqylandy.
– 2014 jyly parlamentaralyq qatynastarymyzdyń jańa kezeńi bastalǵanyn atap ótkim keledi. Sol kezdegi Marokkonyń Keńesshiler palatasynyń tóraǵasy Muhammed Bııadılla Astanaǵa resmı saparmen keldi. Óz kezeginde Qasym-Jomart Toqaev Qazaqstan Parlamenti Senatynyń spıkeri laýazymynda Rabatqa qarymta resmı sapar jasady. Bul qadamdar parlamentterimizdiń arasyndaǵy yntymaqtastyqtyń berik negizin qalady, – dedi Májilis spıkeri.
Keńesshiler palatasynyń tóraǵasy eki el yntymaqtastyǵyn arttyrýda joǵary deńgeıdegi saparlardyń mańyzy zor ekenin atap ótti.
– Aramyz alshaq bolsa da, elderimizdi baılanystyratyn dúnıeler az emes. Biz Qazaqstandy Ortalyq Azııaǵa jol ashatyn el retinde qarastyramyz. Kóktemde Qazaqstannyń Syrtqy ister mınıstri kelip ketti. Búgin Sizdiń resmı saparyńyz ótip jatyr. Osyndaı joǵary deńgeıdegi saparlar baılanystarymyzdyń kókjıegin keńeıte túsýde. Eki el depýtattary birlesip, Marokko Koroli men Qazaqstan Prezıdentiniń úmitin aqtaımyz dep senemin, – dedi Muhammed Ýld Ar-Rashıd.
Sonymen qatar Erlan Qoshanov Marokko Úkimetiniń basshysy Azız Ahannýshpen kezdesti. Onda eki el arasyndaǵy ekonomıkalyq yntymaqtastyqty nyǵaıtýǵa erekshe nazar aýdaryldy.
Taraptar saýda-sattyqty ulǵaıtý, ınvestıtsııa, jasandy ıntellekt, aýyl sharýashylyǵy, kólik-logıstıka salalarynda seriktestikti odan ári kúsheıtý máseleleri men «Orta dáliz» kólik baǵytyn belsene damytý jaıyn ortaǵa saldy. Budan bólek, bilim berý, densaýlyq saqtaý, týrızm jáne mádenıet salasynda da áriptestikti keńeıtý jaıy sóz boldy.
Bıyl eki el azamattary úshin vızasyz rejım kúshine endi. Qazirgi ýaqytta tikeleı reıster ashý máselesi qarastyrylyp jatyr. Bul eki halyqtyń bir-birin jaqyn tanýyna jol ashady.
Sapar aıasynda depýtattar Korol V Muhammed kesenesine baryp, memlekettiń negizin qalaǵan tulǵalar – Korol V Muhammed pen Korol ІІ Hasannyń rýhyna taǵzym etti, gúl shoqtaryn qoıdy.