Májilis tóraǵasy Qyrǵyz Respýblıkasynyń Prezıdentimen kezdesti
ASTANA. KAZINFORM - Májilis tóraǵasy Erlan Qoshanov Qyrǵyz Respýblıkasyna resmı saparynyń ekinshi kúninde Prezıdent Sadyr Japarovpen kezdesti, dep habarlaıdy QR Parlamenti Májilisiniń baspasóz qyzmeti.
Májilis spıkeri Qyrǵyzstan basshysyna Qazaqstan Prezıdenti Qasym-Jomart Toqaevtyń jyly lebizi men izgi tilegin jetkizdi. Sondaı-aq Sadyr Japarovtyń baýyrlas halyqtar arasyndaǵy dostyq pen odaqtastyq qatynastardy nyǵaıtýǵa qosqan zor úlesin atap ótti.
Erlan Qoshanov qazirgi tańda Ortalyq Azııa tutas óńir retinde jańa damý kezeńin bastan keship jatqanyna, bul kezeńdi Qazaqstan Prezıdenti «Ortalyq Azııa Renessansy» dep ataǵanyna nazar aýdardy. Májilis tóraǵasy memleket basshylary qabyldaǵan «Ortalyq Azııa-2040» óńirlik yntymaqtastyqty damytý tujyrymdamasyn júzege asyrýda parlamentterdiń belsendi ról atqarýǵa nıetti ekenin jetkizdi.
Qyrǵyzstan Prezıdentine Jogorký Kenesh tóraǵasy Nurlanbek Shakıevpen kezdesýdiń jáne Qyrǵyz Respýblıkasynyń Jogorký Keneshi men Qazaqstan Respýblıkasy Parlamenti arasyndaǵy yntymaqtastyq jónindegi Parlamentaralyq keńestiń ekinshi otyrysynyń nátıjeleri týraly aqparat berildi. Májilis spıkeri ekijaqty qatynasty nyǵaıtýdaǵy Keńes jumysynyń mańyzdylyǵyna erekshe toqtaldy.
– Parlamentaralyq keńes Qazaqstan men Qyrǵyzstan arasyndaǵy saıası dıalog pen ózara túsinistikti odan ári tereńdetýge yqpal etetin bolady. Onyń tıimdiligin kórip otyrmyz. Keshe qyrǵyz áriptesterimizben saýda-ekonomıka, ınvestıtsııa jáne mádenı-gýmanıtarlyq yntymaqtastyqtyń keleshegin talqyladyq. Shekaralyq baqylaý, sý jáne energetıka qaýipsizdigi salalaryndaǵy yqpaldastyqqa da erekshe kóńil bóldik. Sonymen qatar bizdiń Keńes zań shyǵarý qyzmetinde tájirıbe almasýǵa, týyndaǵan máseleler boıynsha shuǵyl sheshimder qabyldaýǵa jáne parlamentterimizdiń depýtattary arasyndaǵy baılanysty nyǵaıtýǵa zor múmkindik beredi, – dedi Erlan Qoshanov.
Májilis spıkeri sondaı-aq Qyrǵyz Respýblıkasyna aldaǵy Túrki memleketteri uıymyna tóraǵalyǵyna tabys tilep, eki el depýtattarynyń TÚRKPA, UQShU PA, TMD PA sekildi halyqaralyq alańdarda jáne aımaq úshin jańa formattaǵy «Ortalyq Azııa – Koreıa Respýblıkasy» Parlament spıkerleriniń keńesinde kelisilgen jumysyn atap ótti.
Qyrǵyz Respýblıkasynyń basshysy Qazaqstan Prezıdenti Qasym-Jomart Toqaevqa sálemin joldap, onyń jetekshiligimen Qazaqstanda júrgizilip jatqan saıası jáne ekonomıkalyq reformalardy joǵary baǵalady.
Aıta keteıik, Qyrǵyz Respýblıkasyna resmı sapar aıasynda Májilis pen Jogorký Kenesh depýtattarynyń ekijaqty kezdesýi ótti. Qyrǵyz Respýblıkasynyń Jogorký Keneshi men Qazaqstan Respýblıkasy Parlamenti arasyndaǵy yntymaqtastyq jónindegi Parlamentaralyq keńestiń ekinshi otyrysynda keńes týraly ereje qabyldandy.
Osyǵan deıin Májilis tóraǵasy Erlan Qoshanov aldaǵy ýaqytta ákimdikterdiń qyzmeti bıýdjetti tıimdi ıgerýi men kiristi arttyrý jumysy boıynsha baǵalanatynyn aıtty.
