Májilis tarıhı-mádenı mura obektilerin qorǵaýdy kózdeıtin zańdy maquldady
ASTANA. KAZINFORM — Búgin Májilistiń jalpy otyrysynda tarıhı-mádenı mura obektilerin qorǵaý máseleleri kózdelgen zań jobasy birinshi oqylymda maquldandy.
- Bul zań jobasy jaı ǵana tehnıkalyq túzetýler emes. Bul – arheologııany jańa deńgeıge shyǵaratyn, tarıhı muramyzdy qorǵaýdyń júıeli reformasy, - dedi zań jobasyn tanystyrǵan Májilis depýtaty Ashat Aımaǵambetov.
Zań jobasy arheologııa salasyndaǵy tarıhı-mádenı mura obektilerin qorǵaý jáne paıdalaný jónindegi zańnamany jetildirýge baǵyttalǵan. Onyń negizgi erejeleri arheologııalyq jumystardy lıtsenzııalaý júıesin ózgertýdi, sondaı-aq arheologııa eskertkishteri men obektileri týraly derekterdi júıeleýdi kózdeıdi. Sondaı-aq, arheologııalyq jumystar barysynda anyqtalǵan tarıhı-mádenı mura obektileri týraly barlyq málimetterdi jınaqtaý maqsatynda zań jobasynda «Arheologııalyq jumystar jónindegi biryńǵaı avtomattandyrylǵan aqparattyq júıeni» qurý jónindegi normalar bekitilgen.
Munan bólek, arheologııalyq jumystardy jáne arheologııalyq jumystardy júzege asyratyn tulǵalardy ǵylymı-konsýltatsııalyq, aqparattyq-taldamalyq qoldaýdy úılestirý úshin zań jobasy Á.H.Marǵulan atyndaǵy Arheologııa ınstıtýtyn úılestiretin «Ulttyq arheologııalyq qyzmettiń» quzyretterin aıqyndaýdy usynady.
Zań jobasymen jumys barysynda belgili bir merzimge ǵylymı-restavratsııalyq jumystary men arheologııalyq jumystarǵa lıtsenzııa berýge qoıylatyn talaptar qaıta qaralǵan.