Májilis Sý kodeksin qabyldady
ASTANA. KAZINFORM – Búgin Májilistiń jalpy otyrysynda Qazaqstan Respýblıkasynyń Sý kodeksiniń jobasy men ilispe qujat ekinshi oqylymda qaralyp, qabyldandy.
Memleket basshysynyń tapsyrmasy boıynsha jańa Sý kodeksiniń jobasy ázirlendi. Bul qujatta halyqaralyq tájirıbeniń ozyq úlgilerine saı ekojúıeni qorǵaý, klımattyń ózgerýine beıimdelý jáne sý resýrstaryn utymdy basqarý esebinen ekonomıkany turaqty damytýǵa jol ashatyn zańdy tetikter qamtyldy.
Májilis depýtaty Pavel Kazantsevtiń aıtýynsha, jańa Sý kodeksiniń jobasyn qaraý kezinde depýtattar birqatar túzetý engizdi. Onyń arasynda sý sharýashylyǵy qurylystaryn jalǵa nemese senimgerlik basqarýǵa berý qaǵıdalaryn retteý boıynsha is-sharalar talqylandy.
Atalǵan qujatta sý qorǵaý aımaqtary men beldeýleriniń mólsherin, sondaı-aq olardy belgileý tártibin naqtylaýǵa, olardyń aýmaqtarynda sharýashylyq qyzmetke shekteýler rejımin engizýge qatysty túzetý bar.
Sonymen qatar, depýtattar engizgen túzetýlerdiń arasynda arnaıy sý paıdalaný sharttaryn buzǵan sý paıdalanýshylarǵa qatysty jedel den qoıý sharalaryn qoldana otyryp, memlekettik baqylaýdy kúsheıtý jáne qadaǵalaýdy engizý pysyqtaldy.
Kodekste sý resýrstaryn únemdeý ári saqtaý jáne aýyz sýdy tehnıkalyq qajettilikterge paıdalanýdy boldyrmaý maqsatynda tehnıkalyq sýmen jabdyqtaý júıelerin qurý tetekteri naqtylandy.
Іlispe zań qoldanystaǵy zańnamany jańa Sý kodeksiniń normalaryna sáıkestendirý jáne sý resýrstaryn qorǵaý men paıdalaný salasyndaǵy qatynastardy quqyqtyq retteýdi jetildirý maqsatynda ázirlendi. Zań jobasynda Azamattyq, Jer, Kásipkerlik jáne Ekologııa kodeksterine, sondaı-aq qoǵamdyq qatynastardyń ártúrli aspektilerin retteıtin toǵyz zańǵa ózgerister men tolyqtyrýlar engizý eskerilgen.
Jer kodeksine eldi mekender jeriniń quramyndaǵy sý obektileri alyp jatqan jerdi paıdalaný rejımin sý zańnamasyna sáıkes retteý bóliginde túzetý usynyldy.
Sonymen qatar, Ekologııa kodeksi sý qorǵaý aımaqtarynda qyzmetti júzege asyrý kezindegi ekologııalyq talaptardy reglamentteıtin normalarmen tolyqtyryldy.
Eske salsaq, Qazaqstan Respýblıkasy Parlamentiniń Májilisi Sý kodeksiniń jobasyn 2024 jylǵy 27 qarashada birinshi oqylymda maquldady.