Májilis «ST-KZ» nysanyndaǵy jáne ındýstrıaldy sertıfıkatty aýystyrý máselesin qaramaq
ASTANA. KAZINFORM - Májilis spıkeri Erlan Qoshanovtyń tóraǵalyǵymen Bıýro otyrysy ótip, aldaǵy jalpy otyrystyń kún tártibi naqtylandy, dep habarlaıdy QR Parlamenti Májilisiniń baspasóz qyzmeti.
Birinshi oqylymda Májilis taýarlardyń shyǵarylǵan elin aıqyndaý máseleleri boıynsha zań jobasyn talqylaıdy.
Bul zań jobasy Qazaqstan Respýblıkasynyń Prezıdentiniń 2023 jylǵy 1 qyrkúıektegi Joldaýynda aıtylǵan tapsyrmalaryn iske asyrý maqsatymen daıyndalǵan. Zań jobasy otandyq óndiristi damytý, ımporttyq jetkizilimderge táýeldilikti azaıtý jáne jańa óndiristerdi lokalızatsııalaý úshin usynylyp otyr. Osy maqsatta «ST-KZ» nysanyndaǵy qoldanystaǵy sertıfıkattar men ındýstrıaldy sertıfıkatty aýystyratyn Qazaqstannan shyqqan taýarlardyń reestrin qurý usynylady.
Ekinshi oqylymda depýtattar rezervtegi qyzmet máseleleri boıynsha zań jobasyn talqylaıdy. Zań jobasymen jańa áskerı qyzmet túri – rezervtegi qyzmet engiziledi. Bul kelisimshart negizinde turǵylyqty jeri boıynsha erikti túrde júzege asyrylady jáne áskerı daıyndyqty arttyrý úshin rezervtik kúshterdi qurýdy maqsat etedi.
Sonymen qatar depýtattar Túrkııa Respýblıkasymen ósimdikter karantıni jáne olardy qorǵaý salasyndaǵy yntymaqtastyq týraly kelisimdi ratıfıkatsııalaý jónindegi zań jobasyn qaraıdy. Májilis kásibı parasattylyqqa testileý týraly, ekologııalyq máseleleri boıynsha jáne birqatar halyqaralyq kelisimder boıynsha usynylǵan zań jobalaryn jumysqa alýdy josparlap otyr.
Osyǵan deıin Májilistiń zaǵıptarǵa qolaıly jaǵdaı jasaý týraly zańdy qabyldaǵanyn jazǵan edik.