Májilis spıkeri Reseıdiń Qazaqstandaǵy Elshisimen kezdesti
ASTANA. KAZINFORM - Májilis tóraǵasy Erlan Qoshanov Reseı Federatsııasynyń Qazaqstandaǵy Tótenshe jáne Ókiletti Elshisi Alekseı Borodavkındi qabyldady. Taraptar ekijaqty qarym-qatynasty damytý máselesin talqylady.
Erlan Qoshanov Reseı men Qazaqstan tatý kórshi ári odaqtastyq týraly shartty negizge ala otyryp, yntymaqtastyqty júıeli túrde damytyp kele jatqanyn atap ótti.
– Memleket basshylary bizdiń túrli saladaǵy ózara baılanysymyzdyń joǵary qarqynyn aıqyndap berdi. Qasym-Jomart Toqaev pen Vladımır Pýtınniń qatysýymen óńiraralyq yntymaqtastyq forýmdary turaqty túrde ótkizilip, nátıjesinde mańyzdy ekonomıkalyq jobalar qolǵa alynyp jatyr. Bizdiń elder arasyndaǵy taýar aınalymy turaqty ósip keledi jáne 70 paıyz óńirler arasyndaǵy tikeleı saýda arqyly qamtamasyz etilip otyr, – dedi Erlan Qoshanov.
Májilis tóraǵasy parlamentaralyq yntymaqtastyq Qazaqstan-Reseı baılanysynyń mańyzdy quramdas bóligi ekenin aıtty.
Memlekettik Dýmadaǵy áriptestermen túrli formattaǵy – dostyq toptary jáne palataaralyq parlamenttik komıssııa aıasyndaǵy yqpaldastyq arta tústi.
Depýtattar TMD Parlamentaralyq Assambleıasy, UQShU Parlamenttik Assambleıasy, Parlamentaralyq odaq jáne basqa da kópjaqty forýmdar alańynda turaqty túrde pikir almasyp keledi.
– Bıyl Qazaqstan Ujymdyq qaýipsizdik sharty uıymyna tóraǵalyq etýde. Maýsym aıynda Almatyda uıymnyń Parlamenttik Assambleıasy Keńesiniń otyrysy ótedi dep josparlanyp otyr. Biz reseılik áriptesterimizdi Qazaqstanda kútemiz, – dedi Erlan Qoshanov.
Óz kezeginde Elshi Alekseı Borodavkın Qazaqstanmen qoǵamdyq-saıası, saýda-ekonomıkalyq jáne mádenı-gýmanıtarlyq salalarda damyp kele jatqan keń aýqymdaǵy yntymaqtastyqqa Reseı úlken kóńil bóletinin aıtty.
Taraptar Májilis tóraǵasynyń Reseıge resmı saparyna daıyndyq barysyn, sondaı-aq Qazaqstan depýtattarynyń Reseı Federatsııasyndaǵy prezıdent saılaýyn baqylaýǵa qatysýyn talqylady.
Kezdesý qorytyndysy boıynsha taraptar ekijaqty qarym-qatynasty nyǵaıtýǵa, sonyń ishinde parlamentaralyq yntymaqtastyq aıasynda damytýǵa kelisti.
