Erlan Qoshanov Reseı Elshiligi uıymdastyrǵan Jeńistiń 80 jyldyǵyna arnalǵan is-sharada sóz sóıledi
ASTANA. KAZINFORM - Májilis tóraǵasy Erlan Qoshanov Uly Jeńistiń mereıtoıyna oraı Reseı Federatsııasynyń Elshiligi uıymdastyrǵan qabyldaýǵa qatysty, dep habarlaıdy Májilistiń baspasóz qyzmeti.
Palata spıkeri qazaq jaýyngerleriniń erligi, tarıhı estelikterdi jadymyzda saqtaýdyń jáne mundaı qaıǵyly oqıǵalardyń qaıtalanýyna jol bermeýdiń mańyzdylyǵy týraly aıtyp berdi.
Reseı Federatsııasynyń Qazaqstan Respýblıkasyndaǵy Tótenshe jáne ókiletti elshisi Alekseı Borodavkınniń atynan uıymdastyrylǵan qabyldaý qaza tapqan batyrlardy bir mınýt únsizdikpen eske alýdan bastaldy.
- Qazaqstan men Reseı kóshbasshylary Jeńistiń 80 jyldyǵynyń bizdiń elderimiz úshin tarıhı mańyzyn birneshe márte atap ótken bolatyn. Bul – bárimiz úshin qasterli, tarıhynyń tamyry tereńde jatqan aıtýly kún. Sebebi osynaý surapyl jyldary ákelerimiz ben atalarymyz ortaq maqsat – Uly Jeńis úshin batyldyq pen birliktiń eren úlgisin kórsetti. Soǵystyń salqyn lebi shynymen ár qazaqstandyq shańyraqqa áser etti. Sondyqtan jeńimpazdardyń – soǵys ardagerleri men tyl eńbekkerleriniń osyndaı erjúrek býyny jónindegi estelik Qazaqstandaǵy ár úıde búginge deıin seziledi, – dedi Erlan Qoshanov.
Májilis spıkeri qazaqstandyqtardyń natsızmdi jeńýdegi eleýli úlesin eske saldy. Sol ýaqytta elimizde turatyn árbir tórtinshi turǵyn maıdanǵa attandy. Onyń 500-i Keńes Odaǵynyń Batyry atansa, júzden astamy – Dańq ordeniniń tolyq ıegeri boldy. Olardyń tórteýi eki márte Keńes Odaǵynyń Batyry ataǵyn alǵan.
Erlan Qoshanov Máskeý men Lenıngrad túbindegi shaıqastarda, Brest qamalyn qorǵaýda, Kýrsk doǵasynda, Rjev pen Stalıngrad maıdandarynda shaıqasqan qazaqstandyq jaýyngerlerdiń erlikterin atap ótti. Armııany qarý-jaraqpen, ónerkásip taýarlarymen jáne azyq-túlikpen qamtamasyz etken qazaq halqynyń tyldaǵy úlesi týraly aıtyp, ótken qaıǵyly oqıǵalardan sabaq alýdyń mańyzdylyǵyna mán berdi.
– Jaqynda Prezıdent Qasym-Jomart Toqaev Qazaqstan halqy Assambleıasynda: «Uly Jeńistiń taǵylymy barsha halyqqa, ásirese, saıasatkerlerge ksenofobııaǵa, násildik jáne ulttyq ústemdikke, halyqaralyq quqyq qaǵıdattaryn qurmettemeýge qurylǵan jaýapkershilikten jurdaı saıasat júrgizýdiń saldary qandaı qasiretke ákeletinin áli kúnge deıin kórsetip otyr» dep erekshe atap ótti. Osyǵan baılanysty Memleket basshysy BUU Jarǵysy men halyqaralyq quqyq qaǵıdattaryn saqtaý qajettigin únemi atap kórsetip keledi, – dedi Erlan Qoshanov.
Sonymen qatar Májilis spıkeri Qazaqstan depýtattary osy atalǵandardy basshylyqqa alyp, berik dostyq pen yntymaqtastyq ornatý úshin parlamenttik dıplomatııanyń múmkindikterin keńinen paıdalanyp otyrǵanyn erekshe atap ótti. Palata tóraǵasy jaqynda Volgogradta ótken Halyqaralyq forýmǵa Májilis delegatsııasynyń qatysqany týraly aıtyp berdi. Onda depýtattar túrli elderdiń Parlament ókilderimen birge fashızmge qarsy kúrestiń álemdik tarıhı mańyzyn talqylady.
Erlan Qoshanov Qazaqstan Prezıdentiniń bastamasymen dańqty erlikteri úshin «Aıbyn» ordeniniń úsh dárejesine Saǵadat Nurmaǵambetov, Baýyrjan Momyshuly jáne Rahymjan Qoshqarbaevtyń esimderi berilgenin aıtty. Al 604-shi áýe bazasy Qazaqstannyń áýe qorǵanys kúshteri eki márte Keńes Odaǵynyń Batyry, aty ańyzǵa aınalǵan ushqysh Sergeı Lýganskııdiń esimimen atala bastady.
Májilis spıkeri Uly Jeńistiń mereıtoıyna arnap Qazaqstan boıynsha shamamen eki myńǵa jýyq eske alý, ǵylymı-zertteý, aǵartýshylyq jáne basqa da is-sharalar ótetinin atap ótti. El Prezıdentiniń tapsyrmasymen respýblıka boıynsha eldimekenderde 500-den astam kóshe jergilikti jerlerdiń batyrlary – soǵys ardagerleriniń esimimen atalady. Jeńistiń mereıtoıyn atap ótý aýqymdy áskerı paradta jalǵasyn tabady.
Іs-sharaǵa dıplomatııalyq korpýs, Qazaqstannyń memlekettik organdary men Qarýly Kúshteriniń ókilderi, sondaı-aq qoǵam qaıratkerleri qatysty.
Osyǵan deıin Almatynyń 28 panfılovshy saıabaǵynda ashyq aspan astyndaǵy mýzeı ashylǵany týraly jazdyq.